मुंबई | प्रतिनिधी : महिला व बालविकास विभागाच्या वतीने महिलांच्या अडचणी, तक्रारी व प्रश्न थेट प्रशासनासमोर मांडण्यासाठी “महिला लोकशाही दिन” हा उपक्रम दरमहा जिल्हास्तरावर आयोजित करण्यात येतो. या उपक्रमाच्या माध्यमातून समस्याग्रस्त व पीडित महिलांना संवादाचे खुले व्यासपीठ मिळावे तसेच त्यांचे हक्क संरक्षित व्हावेत या उद्देशाने हा दिन साजरा केला जातो.
मुंबई शहर जिल्हास्तरीय महिला लोकशाही दिन १५ सप्टेंबर २०२५ रोजी, मुंबई शहर जिल्हाधिकारी कार्यालयात सकाळी ११.०० ते दुपारी १.०० या वेळेत आयोजित करण्यात आला आहे, अशी माहिती महिला व बालविकास अधिकारी सौ. शोभा शेलार यांनी दिली आहे.
तक्रार दाखल करू इच्छिणाऱ्या महिलांनी आपले अर्ज जिल्हा महिला व बाल विकास अधिकारी कार्यालय,
११७, बी.बी.डी. चाळ, पहिला मजला, वरळी, मुंबई – ४०००३० या पत्त्यावर सादर करावेत.
तक्रारींसोबत संबंधित कागदपत्रांची प्रत जोडणे आवश्यक असून, महिला आपले अनुभव, प्रश्न व अडचणी लेखी स्वरूपात सादर करू शकतात. या तक्रारींची सुनावणी महिला लोकशाही दिनाच्या दिवशी अधिकृत स्तरावर केली जाईल.महिला व बालविकास विभागाच्या या उपक्रमामुळे अनेक महिलांना आपल्या अडचणी, घरगुती हिंसाचार, मालमत्तेचे व सामाजिक समस्यांचे निराकरण करण्यासाठी थेट संधी मिळते आहे.
मुंबई शहरातील महिलांनी या उपक्रमाचा लाभ घ्यावा, असे आवाहन महिला व बालविकास अधिकारी सौ. शेलार यांनी केले आहे.