घोडबंदरची वाहतूक कोंडी संपणार? रात्री १२ नंतरच जड वाहने सोडण्याचे उपमुख्यमंत्री शिंदेंचे आदेश

ठाणे : घोडबंदर रस्त्यावर होणाऱ्या तीव्र वाहतूक कोंडीमुळे स्थानिक नागरिक त्रस्त असून, या समस्येवर तातडीने उपाययोजना करण्यासाठी उपमुख्यमंत्री एकनाथ शिंदे यांनी उशीरा रात्री सर्व संबंधित यंत्रणांची आपत्कालीन बैठक घेतली.

या बैठकीत उपमुख्यमंत्री शिंदे यांनी स्पष्ट आदेश दिले की, घोडबंदर रस्त्यावर रात्री १२ वाजल्यानंतरच जड वाहने सोडण्यात यावीत तसेच वेळेचे बंधन न पाळणाऱ्या अधिकाऱ्यांवर कडक कारवाई करण्याचे आदेश त्यांनी समन्वय समितीचे अध्यक्ष व जिल्हाधिकारी डॉ. श्रीकृष्ण पांचाळ यांना दिले.

उपमुख्यमंत्री शिंदे यांनी ठाणे वाहतूक विभागाचे उपायुक्त पंकज शिरसाट यांना रस्त्यावरील वाहतूक सुरळीत ठेवण्यासाठी आवश्यक मनुष्यबळ वाढवण्याच्या सूचना केल्या.

तसेच त्यांनी ठाणे, मीरा-भाईंदर, नवी मुंबई, पालघर येथील महापालिका, पोलीस व जिल्हा प्रशासन यांना परस्पर समन्वय साधून काम करण्याचे स्पष्ट आदेश दिले.

जेएनपीटीकडून येणारी जड वाहनेही रात्री १२ नंतरच सोडावीत, अशा सूचना जेएनपीटीचे मुख्य व्यवस्थापकीय संचालक उन्मेष वाघ यांना दिल्या. यासाठी नवी मुंबई वाहतूक पोलिस उपायुक्त काकडे यांना वाहतूक व्यवस्थापनाचे नियोजन करण्यास सांगितले.

जड वाहनांच्या व्यवस्थेसाठी चिंचोटी व आच्छाड येथे पार्किंगची व्यवस्था करण्याचे निर्देश उपमुख्यमंत्री शिंदे यांनी दिले. तसेच अहमदाबादकडून येणाऱ्या वाहनांनाही रात्री १२ नंतरच घोडबंदरमार्गे सोडावे, असे निर्देश त्यांनी संबंधित पोलीस व प्रशासन अधिकाऱ्यांना दिले.

या बैठकीस ठाणे महापालिकेचे अतिरिक्त आयुक्त संदीप माळवी, वाहतूक पोलिस उपायुक्त पंकज शिरसाट, पोलिस उपायुक्त प्रशांत कदम उपस्थित होते.

Leave a Reply

Your email address will not be published. Required fields are marked *