महाड – महाड शहर स्वच्छ आणि सुंदर व्हावे. या शहरात कुठे काय असावे याचे नियोजन करू. सुदैवाने देवेंद्र फडणवीस या राज्याचे मुख्यमंत्री आहेत. त्यांच्याकडून महाड शहरासाठी विशेष पॅकेज घेऊ. महाड शहर हे ऐतिहासिक शहर आहे. छत्रपती शिवाजी महाराजांची राजधानी येथे आहे. या शहराचे वैभव वाढावे ही येणाऱ्या नगराध्यक्षांची जबाबदारी आहे. महाड शहर आदर्श व सुसंस्कृत होईल यासाठी प्रयत्न करु, अशी ग्वाही भाजपा गटनेते आणि महाराष्ट्र गृहनिर्माण स्वयं/समूह पुनर्विकास प्राधिकरणाचे अध्यक्ष आमदार प्रवीण दरेकर यांनी पत्रकार परिषदेत दिली.
महाड नगरपरिषद सार्वत्रिक निवडणुकीच्या प्रचारानिमित्त भाजपा आमदार प्रवीण दरेकर हे दोन दिवसीय महाड दौऱ्यावर आहेत. आज दौऱ्याच्या शेवटच्या दिवशी पत्रकार परिषदेचे आयोजन करण्यात आले होते. या पत्रकार परिषदेत दरेकर यांनी महाड शहराच्या सर्वांगीण विकासाबाबत भूमिका मांडली. या पत्रकार परिषदेला महिला व बालकल्याण मंत्री आदिती तटकरे, भाजपा नेते बिपीन म्हामुणकर आदी मान्यवर उपस्थित होते.
पत्रकार परिषदेला संबोधित करताना आ. दरेकर म्हणाले कि, राष्ट्रवादी-भाजपा युतीचे निर्विवाद बहुमत येईल असे चित्र महाडमध्ये आहे. निवडणुकीला सामोरे जाताना राजकारणाचा धंदा मांडलेली लोकं आणि सुसंस्कृत राजकारण अशी लढाई होणार आहे. पंतप्रधान नरेंद्र मोदी यांनी देशाला विकासाचे राजकारण दाखवले. दंडेलशाही, पैसा या पलीकडे जाऊन लोकं विकासाला मत देतात हे त्यांनी देशपातळीवर सिद्ध केलेय. एवढेच नव्हे तर बिहारला नुकत्याच निवडणुका झाल्या. तेथे जातीपातीत निवडणुका लढवल्या जायच्या. परंतु तेथील युवक आणि महिलांनी पहिल्यांदाच विकासाला मत दिले. महाराष्ट्रातही मुख्यमंत्री देवेंद्र फडणवीस यांच्या नेतृत्वाखाली विकासाचे राजकारण होऊ शकते हे दिसतेय. कुठलेही नेतृत्व प्रेरणा देणारे असायला हवे. महाड शहराला काय पाहिजे हे घेऊन राष्ट्रवादी आणि भाजपा युती लोकांसमोर जात आहे. येणाऱ्या काळात महाडमध्ये मोठ्या प्रमाणावर विकास झालेला दिसेल, असेही दरेकरांनी म्हटले.
दरेकर पुढे म्हणाले कि, दौऱ्यात व्यस्त असतानाही काल मुख्यमंत्री देवेंद्र फडणवीस यांनी महाड शहराला जे लागेल ते देण्यासाठी मुख्यमंत्री म्हणून मी तुमच्या पाठीशी आहे असा शब्द दिला. चवदार तळ्याच्या सत्याग्रहाला २०२७ मध्ये शंभर वर्ष पूर्ण होणार आहेत. त्या तळ्याचा शताब्दी महोत्सव मोठ्या ताकदीने साजरा करू, असेही मुख्यमंत्र्यांनी आश्वस्त केलेय. महाड शहराच्या वाहतूक कोंडीचा, शहराला पुरेसा पाणीपुरवठा करण्याबाबतचा आणि येथील हौसिंगमध्ये राहत असलेल्या लोकांचे प्रश्न आहेत. मुंबईत आम्ही स्वयं पुनर्विकास योजना आणली. या योजनेला मोठ्या प्रमाणावर प्रतिसाद मिळतोय. आम्ही नोडल एजन्सी म्हणून पैशांची व्यवस्था केली. मुख्यमंत्र्यांनी आमच्या १८ पैकी १६ मागण्या मान्य केल्या. त्यामुळे या योजनेला गती मिळाली. त्यानंतर माझ्या अध्यक्षतेखाली अभ्यास गट. स्थापन केला. माझ्या अभ्यास गटाने स्वतंत्र प्राधिकरण असावे अशी मागणी केलेली. ती मान्य करून त्या प्राधिकरणाचा अध्यक्ष व मंत्री पदाची जबाबदारीही मलाच देण्यात आली. हे प्राधिकरण राज्यासाठी आहे. पहिली सुरुवात महाड नगरपालिकेतून करू. विशेष एफएसआय मिळेल आणि हा विषय मार्गी लावू, असेही दरेकरांनी म्हटले.
दरेकर पुढे म्हणाले कि, महाड चवदार तळ्याच्या प्राधिकरणासाठी १३ ऑगस्ट २०२५ रोजीच मुख्यमंत्री फडणवीस यांना पत्र दिलेय. पर्यटनाच्या माध्यमातून अहिल्यादेवी होळकर मंदिर जिर्णोद्धार सुशोभीकरण, अंबिका माता आणि महीकादेवी मंदिर परिसर सुशोभीकरणाचे प्रस्ताव पर्यटनाच्या माध्यमातून पाठवण्यात आलेत. विरेश्वरसाठी माझ्या निधीतून ३ कोटी रुपये देऊन सुशोभीकरण केले. मच्छिमार्केटसाठी ५५ कोटी रुपये मंजूर करून घेण्यात आलेत. कधीच मार्केटिंग केली नाही. प्रामाणिक भावनेने काम केलेय. यासाठी महाडकरांचा उत्स्फूर्त प्रतिसाद मिळतोय. कालच डॉक्टर असोसिएशनची बैठक घेतली. त्यांच्या समस्या जाणून घेतल्या. त्यांना माझ्या आमदार निधीतून ऍम्ब्युलन्स देणार आहोत. एमपीएससी, यूपीएससीचे सेंटरही नगरपालिका क्षेत्रात निर्माण करू. खेड्यातून,शहरातून चांगले अधिकारी व्हावेत यासाठी प्रयत्न करू. खेळाडूंसाठी क्रीडा भवनाचाही प्रस्ताव देऊ, असेही दरेकरांनी आश्वस्त केले. तसेच कमळ आणि घड्याळाचे बटण दाबून येथील जनतेने ही नगरपालिका ताब्यात द्यावी, नगराध्यक्ष पदाचे उमेदवार सुदेश कळमकर यांना आशीर्वाद द्यावा असे आवाहनही दरेकर यांनी महाडवासियांना केले.