प्रमोद देठे – मुंबई : नगरपालिकेच्या बेफिकीर कारभाराचा आणखी एक नमुना समोर आला असून ई विभागातील मतदारांची नावे थेट डी विभागाच्या यादीत, तर डी विभागातील मतदारांची नावे ई विभागात टाकून महापालिकेने जबरदस्त गोंधळ घातला आहे. या गंभीर चुकीबद्दल तातडीने दुरुस्तीसाठी मनसेचे उपविभाग अध्यक्ष अनिल शांताराम नागरे यांनी हरकत अर्ज सादर करून मनपाला चांगलेच सुनावले आहे.
मुंबादेवी विधानसभा क्षेत्रातील ग्रँड रोड आणि मुंबई सेंट्रल भागात मनसेच्या पुढाकाराने मतदार तपास शिबिर आयोजित करण्यात आले. या शिबिरात नागरिकांनी प्रत्यक्ष नावांची पडताळणी केली असता महापालिकेच्या कामकाजातील निष्काळजीपणाचे धक्कादायक चित्र समोर आले. मतदारांची नावे चुकीच्या विभागात टाकल्याने अनेकांचे मतदान हक्क धोक्यात येऊ शकतात, अशी तक्रार नागरिकांनी केली.
या गोंधळाबाबत मनसे नेते अनिल नागरे यांनी मनपाच्या निवडणूक विभागावर ताशेरे ओढत म्हटले की, “लोकशाहीचा पाया असलेल्या मतदारयादीतच एवढा गोंधळ असेल तर निवडणूक पारदर्शक कशी होणार?” त्यांनी मनपाने त्वरित दुरुस्ती करून योग्य विभागनिहाय यादी प्रसिद्ध करावी, अशी मागणी केली आहे.
अनिल शांताराम नागरे (उपविभाग अध्यक्ष)