भाईंदर – मीरा-भाईंदर आणि मुंबई दरम्यान नागरिकांच्या दीर्घकाळच्या मागणीला प्रतिसाद देत, दहिसर टोल नाका स्थलांतरित करण्याचा निर्णय शासनामार्फत घेण्यात आला आहे. यानंतर आज महाराष्ट्र राज्य परिवहन मंत्री व धाराशिव जिल्ह्याचे पालकमंत्री प्रताप इंदिराबाई बाबुराव सरनाईक यांनी दहिसर टोल नाका आणि प्रस्तावित नवीन टोल स्थान – वर्सोवा पुलासमोरील नर्सरी परिसर – येथे पहाणी दौरा केला.
उपमुख्यमंत्री एकनाथ शिंदे यांच्या मार्गदर्शनाखाली झालेल्या उच्चस्तरीय बैठकीत या निर्णयावर अंतिम शिक्कामोर्तब करण्यात आले असून, दिवाळीपूर्वीच स्थलांतर प्रक्रिया पूर्ण केली जाईल, असे सांगण्यात आले आहे.
पहाणी दौऱ्यानंतर माध्यमांशी बोलताना मंत्री प्रताप सरनाईक म्हणाले, “दहिसर टोल नाक्यामुळे दररोज लाखो नागरिकांना वाहतूक कोंडी, इंधन अपव्यय, विलंब आणि प्रदूषणाचा सामना करावा लागत होता. त्यामुळे वर्सोवा पुलासमोरील नर्सरीजवळ टोल नाका स्थलांतरित करण्याचा निर्णय झाला आहे. या निर्णयामुळे मीरा-भाईंदर ते मुंबई प्रवास अधिक सुलभ होईल आणि स्थानिक नागरिकांना मोठा दिलासा मिळेल.” त्यांनी पुढे सांगितले की,“शहरातील वाहतूक व्यवस्थापन सुरळीत होईलच, शिवाय मीरा-भाईंदर परिसरातील नागरिकांना टोलमुक्त प्रवासाची शिवसेनेकडून दिवाळीपूर्वीच भेट मिळणार आहे.”
या पहाणी दौऱ्यावेळी भारतीय राष्ट्रीय महामार्ग प्राधिकरण(NHAI) व्यवस्थापकीय संचालक सुहास चिटणीस, मिरा-भाईंदर महानगरपालिका आयुक्त राधाबिनोद शर्मा, मिरा-भाईंदर-वसई-विरार पोलीस आयुक्त निकेत कौशिक, वाहतूक पोलीस उपायुक्त अशोक वीरकर त्याचसोबत महाराष्ट्र राज्य रस्ते विकास महामंडळाचे अधिकारी, राष्ट्रीय महामार्ग प्राधिकरणाचे प्रतिनिधी तसेच स्थानिक लोकप्रतिनिधी उपस्थित होते.