मिरा-भाईंदर : पाळीव प्राण्यांना सन्मानाने निरोप देण्याची व्यवस्था आता प्रत्यक्षात आली आहे. महाराष्ट्रातील पहिली पाळीव प्राण्यांसाठी समर्पित स्मशानभूमी नवघर येथे सुरु करण्यात आली आहे. या स्मशानभूमीचे लोकार्पण राज्याचे परिवहन मंत्री आणि धाराशिव जिल्ह्याचे पालकमंत्री मा. ना. प्रताप सरनाईक यांच्या संकल्पनेतून आणि पुढाकारातून पार पडले.
या सुविधेच्या अभावामुळे आजवर पाळीव प्राण्यांचे मृतदेह अनेकदा नदी-नाल्यांत, कचराकुंडीत किंवा उघड्या जागेत टाकले जात होते. यामुळे प्रदूषण, दुर्गंधी आणि रोगराईचा धोका वाढत होता. आता ही सुविधा उपलब्ध झाल्यामुळे आरोग्य सुरक्षा आणि पर्यावरण रक्षणाला मोठी मदत होणार आहे.
पर्यावरणपूरक गॅस शवदाहिनीची वैशिष्ट्ये
नवघर येथे उभारण्यात आलेली ही गॅसवर चालणारी शवदाहिनी प्रोपेन (LPG) चा वापर करून शास्त्रीय पद्धतीने अंत्यविधी पार पाडते.
या प्रक्रियेमुळे लाकूड जाळण्याची गरज नाही, त्यामुळे प्रदूषणात घट आणि कार्बन उत्सर्जन नियंत्रणात ठेवले जाते.
मिरा-भाईंदर शहरात नवघरनंतर काशिमिरा येथेही अशीच दुसरी स्मशानभूमी उभारण्यात आली असून, तिचे लोकार्पण लवकरच होणार असल्याची माहिती मंत्री सरनाईक यांनी दिली.
प्राणीप्रेमी आणि नागरिकांकडून स्वागत
या उपक्रमाचे मिरा-भाईंदर शहरातील प्राणीप्रेमी आणि नागरिकांनी स्वागत करत भावनिक आणि पर्यावरणीय दृष्टिकोनातून आवश्यक असा निर्णय असल्याचे मत व्यक्त केले आहे.
मंत्री प्रताप सरनाईक म्हणाले, “पाळीव प्राणी हे अनेकांसाठी फक्त प्राणी नसतात, तर कुटुंबाचा भाग असतात. त्यांच्या अंत्यविधीसाठी आदराने आणि सुसज्ज पद्धतीने व्यवस्था असावी, ही काळाची गरज होती. मिरा-भाईंदरमध्ये सुरू झालेली ही सेवा राज्यातील इतर शहरांसाठी प्रेरणादायी ठरेल.”