भाईंदर – मिरा-भाईंदर पूर्व येथे उभारण्यात येत असलेल्या हिंदूरक्षक छत्रपती संभाजी महाराज उद्यानाच्या कुंपण भिंतीचे भूमिपूजन सोहळा राज्याचे परिवहन मंत्री आणि धाराशिव जिल्ह्याचे पालकमंत्री प्रताप इंदिराबाई बाबुराव सरनाईक यांच्या हस्ते पार पडला.
या भव्य प्रकल्पाच्या भूमिपूजनप्रसंगी नागरिक, प्रशासकीय अधिकारी आणि विविध क्षेत्रातील मान्यवर उपस्थित होते. छत्रपती संभाजी महाराजांच्या पराक्रम, शौर्य आणि धर्मरक्षणाच्या कार्याला अभिवादन करण्याच्या उद्देशाने हे उद्यान उभारले जात असून, हे उद्यान भविष्यात प्रेरणास्थान ठरणार असल्याचे मत मंत्री सरनाईक यांनी व्यक्त केले.
या उद्यानाचे एकूण क्षेत्रफळ १३,६३४ चौ. मीटर असून, २१५ मीटर लांबीची कुंपण भिंत, छत्रपती संभाजी महाराजांचा भव्य पुतळा, समोरील फाउंटन, विजयगाथा सांगणारे वस्तूसंग्रहालय, शिवकालीन गड-किल्ल्यांच्या प्रतिकृती, ज्येष्ठ नागरिकांसाठी कट्टा, विद्यार्थ्यांसाठी मैदान, आणि विरंगुळा कट्टा यांसारखी विविध वैशिष्ट्ये असणार आहेत.
या प्रकल्पासाठी लागणारी जमीन जिल्हाधिकाऱ्यांकडून महानगरपालिकेला हस्तांतरित करण्यासाठी मंत्री सरनाईक यांनी पुढाकार घेतला.
उपमुख्यमंत्री एकनाथ शिंदे यांनी शहरातील उद्यानांच्या विकासासाठी मंजूर केलेल्या ५० कोटी रुपयांच्या निधीतून ५ कोटी रुपये या उद्यानासाठी खर्च करण्यात येत आहेत.
या प्रसंगी मंत्री सरनाईक म्हणाले,“छत्रपती संभाजी महाराजांचे जीवन आणि कार्य भावी पिढ्यांना दिशा देणारे आहे. त्यांच्या शौर्यकथा आणि धर्मरक्षणाची जाणीव नागरिकांच्या मनात सतत जागृत राहावी, यासाठी हे उद्यान साकारले जात आहे.”
या कार्यक्रमाला मिरा-भाईंदर महानगरपालिका आयुक्त राधबिनोद शर्मा, महानगरपालिका व पोलीस प्रशासनातील वरिष्ठ अधिकारी, तसेच हिंदू संघटनांचे पदाधिकारी व स्थानिक नागरिक मोठ्या संख्येने उपस्थित होते.