शालेय विद्यार्थ्यांसाठी एसटीची हेल्पलाइन सुरू!!!
बस उशिरा? रद्द? तक्रार करा 1800 221 251 वर — परिवहन मंत्री सरनाईक
मुंबई : शाळा–महाविद्यालयीन विद्यार्थ्यांना एसटी प्रवासात येणाऱ्या अडचणींची तात्काळ दखल घेण्यासाठी राज्य परिवहन विभागाने मोठी पायरी उचलली आहे. एसटी महामंडळाची 1800 221 251 ही विशेष हेल्पलाइन विद्यार्थ्यांसाठी सुरू करण्यात आली असल्याची माहिती परिवहन मंत्री तथा एसटी महामंडळाचे अध्यक्ष प्रताप सरनाईक यांनी दिली.
राज्यातील लाखो विद्यार्थी रोज एसटीने शाळेत ये–जा करतात. सरकार विद्यार्थ्यांना मासिक पासमध्ये 66.66 टक्के सवलत देत असून, पुण्यश्लोक अहिल्याबाई होळकर योजनेत बारावीपर्यंतच्या मुलींना मोफत पास दिला जातो. मात्र बस वेळेत न सुटणे, अचानक रद्द होणे, गर्दीमुळे थांब्यावर न थांबणे, तांत्रिक बिघाड अशा अनेक तक्रारी विद्यार्थी-मुलींनी मांडल्या होत्या.
धाराशिव मध्यवर्ती बसस्थानकाला केलेल्या भेटीदरम्यान विद्यार्थ्यांनी मांडलेल्या समस्या ऐकल्यावर मंत्री सरनाईक यांनी तातडीने ही हेल्पलाइन सुरू करण्याचे निर्देश दिले. बस उशिरा आल्याने विद्यार्थ्यांचे शैक्षणिक नुकसान होत असून, काही वेळा परीक्षा देखील चुकत असल्याचे निदर्शनास आले.
आपत्कालीन परिस्थितीत विद्यार्थी, पालक किंवा शाळा–महाविद्यालये थेट या क्रमांकावर संपर्क साधू शकतील. राज्यातील ३१ विभाग नियंत्रण कक्षांचे संपर्क क्रमांक शाळांना देण्यात येणार असून, गरज पडल्यास प्राचार्य–मुख्याध्यापकही विभाग नियंत्रकांशी थेट बोलून मदत मागू शकतील.
बससेवा वेळेत न देणे, विद्यार्थ्यांना त्रास देणे किंवा गैरव्यवस्थापनाबाबत लेखी तक्रार आल्यास जबाबदार पर्यवेक्षक किंवा अधिकारी यांना निलंबित अथवा सक्तीच्या रजेवर पाठवले जाईल, अशी कडक भूमिका सरनाईक यांनी स्पष्ट केली. तसेच सोमवार ते शुक्रवार संध्याकाळी ५ ते ६ या वेळेत विद्यार्थी जिथे जास्त प्रमाणात चढ–उतार करतात त्या थांब्यांवर संबंधित पर्यवेक्षक गणवेशात उपस्थित राहून तातडीने वाहतुकीचे नियोजन करतील, असेही आदेश देण्यात आले आहेत.
विद्यार्थ्यांना सुरक्षित, वेळेवर आणि त्रासमुक्त प्रवास उपलब्ध करून देण्यासाठी एसटी प्रशासनाने हा निर्णय स्वागतार्ह असल्याची प्रतिक्रिया पालकांकडून व्यक्त केली जात आहे.