गिरगाव चौपाटी, मुंबई – महाराष्ट्र शासनाने गणेशोत्सवाला राज्य महोत्सवाचा दर्जा दिल्यानंतर, त्याचा जल्लोष आज गिरगाव चौपाटीवरील विसर्जन सोहळ्यात उच्चांक गाठताना दिसला. ढोल-ताशांच्या निनादात, “गणपती बाप्पा मोरया”च्या जयघोषात संपूर्ण वातावरण भक्तिभावाने भारावून गेले होते.
बृहन्मुंबई महानगरपालिकेमार्फत आयोजित या भव्य विसर्जन मिरवणुकीत मुख्यमंत्री देवेंद्र फडणवीस यांनी स्वतः सहभागी होत गणरायाच्या मूर्तींवर पुष्पवृष्टी करत निरोप दिला. त्यांच्या सोबत उपमुख्यमंत्री एकनाथ शिंदे, मंत्री मंगलप्रभात लोढा, केंद्रीय राज्यमंत्री रामदास आठवले, राज्यमंत्री योगेश कदम, आमदार अमित साटम यांच्यासह अन्य मान्यवरही उपस्थित होते.
मुख्यमंत्री फडणवीस यांनी सांगितले, “दहा दिवस बाप्पा आपल्या घरी असतात आणि आनंद देतात. विसर्जनावेळी मनात थोडं दुखंही असतं, पण ‘पुढच्या वर्षी लवकर या’ ही भावना प्रत्येकाच्या मनात असते.”
ते पुढे म्हणाले, “मुंबई, पुणे व राज्यभरातील सर्व गणेशोत्सव शांततेत, उत्साहात आणि शिस्तीत पार पडले. पोलिस विभाग, महापालिका, स्थानिक प्रशासन यांनी उत्कृष्ट व्यवस्थापन करून हा उत्सव सुरळीत पार पाडला, त्यांचे मन:पूर्वक अभिनंदन.”
या विसर्जन सोहळ्यात विधान परिषद सभापती प्रा. राम शिंदे, मुंबई महापालिका आयुक्त भूषण गगराणी, अतिरिक्त आयुक्त अमितकुमार सैनी, विविध गणेश मंडळांचे पदाधिकारी आणि हजारो गणेशभक्त मोठ्या श्रद्धेने सहभागी झाले होते.
