मुंबई | प्रतिनिधी – पंतप्रधान नरेंद्र मोदी यांच्या नेतृत्वाखाली केंद्र सरकारने घेतलेल्या जीएसटी दरातील महत्त्वपूर्ण बदलांच्या पार्श्वभूमीवर संपूर्ण देशात ‘जीएसटी बचत उत्सव’ साजरा करण्यात येत आहे. या उपक्रमाअंतर्गत मुंबईतील काळबादेवी विभागात राज्याचे उपमुख्यमंत्री एकनाथ शिंदे यांनी स्थानिक व्यापाऱ्यांशी संवाद साधला.
हिंदुस्थान चेंबर ऑफ कॉमर्सच्या सदस्य व्यापाऱ्यांसोबत झालेल्या या संवादात उपमुख्यमंत्री शिंदे यांनी नव्याने लागू करण्यात आलेल्या दोन स्लॅब प्रणाली (५% आणि १८%) विषयी माहिती दिली. त्यांनी स्पष्ट केले की, “या निर्णयामुळे कर रचनेत पारदर्शकता येणार असून व्यापारी वर्गाला दिलासा मिळेल, तसेच ग्राहकांनाही अनेक वस्तू कमी दरात मिळू शकतील.”
यावेळी व्यापाऱ्यांनी उपमुख्यमंत्री शिंदे यांचा सन्मान करून त्यांचे आभार मानले. तसेच जीएसटीच्या अंमलबजावणीत अडचणी आल्यास राज्य शासनाकडून सर्वतोपरी सहकार्य केले जाईल, अशी ग्वाहीही शिंदे यांनी दिली.
या संवाद कार्यक्रमाला खासदार मिलिंद देवरा, शिवसेनेच्या सुशिबेन शहा, हिंदुस्थान चेंबर ऑफ कॉमर्सचे अध्यक्ष सुशील गाडिया, रामकिशोर दरक, महेंद्र जैन, अमृत खेवसारा, अनुराग पोद्दार, माजी आमदार राज पुरोहित, शिवसेना मुंबादेवी विधानसभा विभागप्रमुख रुपेश रमेश पाटील, शिवसेनेचे राजाराम देशमुख आणि इतर व्यापारी बांधव उपस्थित होते.
उपमुख्यमंत्री शिंदे यांनी सांगितले की, “जीएसटी सुधारणा हा केवळ कर व्यवस्थेतील बदल नसून, आत्मनिर्भर भारताच्या दिशेने टाकलेले भक्कम पाऊल आहे.” यावेळी उपस्थित व्यापाऱ्यांनी नव्या कर रचनेचे स्वागत करत देशाच्या आर्थिक विकासात या निर्णयाचा मोठा वाटा राहील, अशी भावना व्यक्त केली.