( प्रमोद देठे )- शिवसेनेच्या दसरा मेळावा २०२५ साठी भव्य, शिस्तबद्ध आणि यशस्वी आयोजनाचे नियोजन करण्याच्या दृष्टीने शिवसेना मुंबादेवी विधानसभा तर्फे शाखा प्रमुख, महिला शाखा प्रमुख तसेच युवासेनेच्या पदाधिकाऱ्यांची संयुक्त बैठक घेण्यात आली.
ही बैठक दिनांक २४ सप्टेंबर २०२५ रोजी सायंकाळी ८.०० वा. शिवसेना मुंबादेवी विधानसभा मध्यवर्ती जनसंपर्क कार्यालयात पार पडली. बैठकीच्या अध्यक्षस्थानी शिवसेना मुंबादेवी विधानसभा विभाग प्रमुख रुपेश पाटील हे होते.
या बैठकीत १) प्रत्येक शाखेतून दोन बस उपलब्ध करून देण्याचे निर्देश देण्यात आले, तसेच मेळाव्यासाठी मुंबादेवी विभागातून किमान १००० कार्यकर्त्यांची उपस्थिती सुनिश्चित करण्याचा निर्धार व्यक्त करण्यात आला.
२) शिस्त व अनुशासन राखत जल्लोषात मेळाव्याचे आयोजन करण्यावर भर देण्यात आला. एकमेकांशी सहकार्य, आदर आणि सौजन्याने वागणूक देण्याची विनंती करण्यात आली.
३) संघटनेच्या कार्यासाठी आपसी वाद बाजूला ठेवून एकत्रितपणे काम करण्याचे आवाहन करण्यात आले. टीका-टिप्पणी न करता सकारात्मक दृष्टीकोन ठेवण्यावर भर देण्यात आला.
४) शाखा प्रमुखांनी आपापल्या टीमसोबत समन्वय ठेवत जबाबदाऱ्या नीट पार पाडाव्यात, अशी सूचना देण्यात आली.
५) पक्ष प्रोटोकॉलचे काटेकोर पालन करण्यावर भर देण्यात आला. कार्यकर्त्यांनी पक्षाच्या आदेशानुसार कार्य करणे बंधनकारक असल्याचे अधोरेखित करण्यात आले.
६) तांत्रिक बाजूस हाताळताना ‘लक्षवेद’ अॅपचा अधिकाधिक वापर करण्याचे आणि प्रत्येक युवासेना पदाधिकाऱ्याने किमान २० नवीन सदस्यांची भर घालण्याचे उद्दिष्ट ठेवण्यात आले.
या बैठकीत शाखा क्र. २१३, २१६, २२०, २२३ चे शाखा प्रमुख, महिला शाखा प्रमुख व युवासेनेचे महिला व पुरुष पदाधिकारी उपस्थित होते. सर्वांनीच दसरा मेळावा भव्य व यशस्वी करण्यासाठी एकजुटीने आणि उत्साहाने काम करण्याची ग्वाही दिली.