शाळकरी मुलाच्या अपहरणाची धमकी देऊन खंडणी मागणारा स्कुल बस चालक २४ तासांत पोलिसांच्या ताब्यात

 

मिरारोड, (प्रमोद देठे)-  काशिगाव येथील एका इंग्रजी शाळेतील १४ वर्षीय विद्यार्थ्याच्या आईकडून अपहरणाची धमकी देऊन चार लाख रुपयांची खंडणी मागणाऱ्या स्कुल बस चालकाला काशिमीरा पोलिसांनी केवळ २४ तासांत जेरबंद केले आहे. या तत्पर कारवाईमुळे संभाव्य अपहरणाचा कट उधळण्यात पोलिसांना यश आले आहे.

 

धमकीचा व्हॉट्सअॅप मेसेज

 

२४ ऑक्टोबर रोजी फिर्यादी महिलेला अनोळखी मोबाईल क्रमांकावरून व्हॉट्सअॅपवरून वारंवार मेसेज पाठवण्यात आले. त्यामध्ये तिच्या मुलाचे अपहरण करण्यात येईल, अशी धमकी देऊन चार लाख रुपये खंडणीची मागणी केली होती. या प्रकरणी फिर्यादी महिला काशिमीरा पोलिस ठाण्यात दाखल झाल्या आणि पोलिसांनी तत्काळ तपास सुरू केला.

 

फोटोच्या सूत्रावरून आरोपीपर्यंत पोलीस पोचले

 

तपासादरम्यान पोलिसांना समजले की, धमकी संदेशांसोबत पाठवलेला मुलाचा फोटो हा फिर्यादी महिलेने आपल्या मुलाच्या स्कुल बस चालकास दिला होता. संशयाच्या आधारावर त्या बस चालकास पोलिस ठाण्यात बोलावून चौकशी करण्यात आली. सुरुवातीला तो टाळाटाळ करत होता; मात्र चौकशीत त्याने अखेर गुन्ह्याची कबुली दिली.

 

बस चालकच ठरला खंडणीखोर

 

आरोपीचे नाव सदानंद बाबुराव पत्री (वय ३७, रा. महाजनवाडी, काशिमीरा, मिरा रोड) असे असून तो शाळेची मिनी बस चालवतो तसेच मोबाईल व सिमकार्ड विक्रीचे दुकानही चालवतो.

त्याने एका ग्राहकाचा सिमकार्ड फसवणुकीने स्वतःकडे ठेवला आणि त्याच सिमवरून फिर्यादी महिलेला धमकीचे मेसेज व फोटो पाठवले. पोलिस तपासात हेही उघड झाले की, आरोपीने इतर तीन ते चार पालकांकडूनही अशा प्रकारे खंडणी मागण्याचा प्रयत्न सुरू केला होता.

 

२४ तासांत कारवाई

 

काशिमीरा पोलिसांनी सदानंद पत्री यास २६ ऑक्टोबर रोजी रात्री १२.१५ वाजता अटक केली असून त्याची पोलिस कोठडी मिळवण्यात आली आहे. पुढील तपास सुरू आहे.

ही कारवाई पोलीस आयुक्त निकेत कौशिक, अपर पोलीस आयुक्त दत्तात्रय शिंदे, पोलीस उपायुक्त (परिमंडळ १) राहुल चव्हाण, सहायक पोलीस आयुक्त (मिरा रोड विभाग) गणपत पिंगळे, तसेच वरिष्ठ पोलीस निरीक्षक राजेंद्र कांबळे यांच्या मार्गदर्शनाखाली करण्यात आली. कारवाईत पो.उपनि. शिवाजी खाडे, पो.उपनि. राजेश किणी, पो.हवा. राहुल सोनकांबळे, पो.शि. राजेंद्र सुर्यवंशी, पो.शि. राहुल पंडागळे, पो.शि. मुकेश कांबळे, तसेच पोहवा जयप्रकाश जाधव यांनी मोलाची भूमिका बजावली.

Leave a Reply

Your email address will not be published. Required fields are marked *