मीरा-भाईंदर, दि. १७ ऑगस्ट २०२५: प्रताप सरनाईक फाउंडेशन आणि वंदना विकास पाटील जनहित संस्था यांच्या संयुक्त विद्यमाने मीरा-भाईंदरमध्ये ‘संस्कृतीची दहीहंडी २०२५’ हा भव्य उत्सव यंदा प्रथमच मोठ्या उत्साहात साजरा करण्यात आला. ठाण्यात दरवर्षी भव्य स्वरूपात होणारा हा पारंपरिक उपक्रम यंदा परिवहन मंत्री तथा धाराशिव जिल्ह्याचे पालकमंत्री मा. ना. प्रताप इंदिराबाई बाबुराव सरनाईक यांच्या संकल्पनेतून मीरा-भाईंदरपर्यंत पोहोचला.
दहीहंडी उत्सवात १० हून अधिक गोविंदा पथकांनी सहभाग घेत, ५ ते ८ थरांच्या सलामी लावून संपूर्ण परिसरात उत्सवाचे वातावरण निर्माण केले. विशेष बाब म्हणजे, यंदा महिला गोविंदा पथकांनीही उत्स्फूर्त सहभाग नोंदवला. महिला पथकांसाठी आयोजकांकडून विशेष रोख पारितोषिके, सन्मानचिन्हे व लाईफ जॅकेट्स देण्यात आली.
कार्यक्रमात संपूर्ण दिवसभर १०० हून अधिक गोविंदा पथकांनी ५, ६, ७ आणि ८ थरांच्या सलामी लावून वातावरण दणाणून सोडले. ८ थर रचणाऱ्यांना २५००० रुपये, ७ थर रचणाऱ्यांना १५००० रुपये, ६ थर रचणाऱ्यांना १०००० रुपये आणि ५ थर रचणाऱ्यांना ५००० रुपये आणि सन्मानचिन्ह प्रदान करण्यात आले. विशेष बाब म्हणजे महिला गोविंदा पथकांचा उत्स्फूर्त सहभाग यावर्षी दिसून आला.
यंदाच्या ‘मानाच्या दहीहंडी’चा मान जय महाराष्ट्र गोविंदा पथकाने ८ थर रचून पटकावला. त्यांना ₹५ लाखांचे रोख पारितोषिक व आकर्षक ट्रॉफी देऊन गौरविण्यात आले. तसेच जय मल्हार गोविंदा पथकाने केलेल्या उत्कृष्ट सादरीकरणाबद्दल त्यांनाही विशेष ट्रॉफीने सन्मानित करण्यात आले.
कार्यक्रमात सर्वांचे लक्ष वेधून घेतला तो विश्वविक्रमाच्या ऐतिहासिक घटनेने. कोकणनगर गोविंदा पथक (जोगेश्वरी) व जय जवान गोविंदा पथक (जोगेश्वरी) यांनी सलग दोन वेळा १० थर रचून अभूतपूर्व विक्रम घडवून आणला.
मंत्री प्रताप सरनाईक म्हणाले,“दहीहंडी सण माझ्यासाठी यंदा अधिक खास ठरला. आपली पारंपरिक संस्कृती आणि मातीतला खेळ आता आंतरराष्ट्रीय स्तरावर पोहोचत आहे. हे यश पुर्वेश सरनाईक यांच्या अथक प्रयत्नांचे फलित आहे. मीरा-भाईंदरमध्ये हा उपक्रम प्रथमच झाला असला तरी लोकांचा प्रतिसाद आणि गोविंदांचा जोश पाहता, येत्या वर्षांमध्ये हा उत्सव अधिक भव्य स्वरूपात साजरा केला जाईल, याची खात्री वाटते.”
संपूर्ण कार्यक्रम कोणतीही अपघाताची नोंद न होता अत्यंत शिस्तबद्ध पद्धतीने पार पडला. यामुळे ‘संस्कृतीची दहीहंडी २०२५’ हा उपक्रम यशस्वी ठरून दहीहंडी परंपरेला एक नवा आयाम मिळाला आहे.