मुंबई – मराठवाड्यात अतिवृष्टीने बाधित झालेल्या बळीराजाला, शेतकऱ्याला मदतीचा हात, दिलासा मिळावा या हेतूने कॅबिनेट मंत्री आमदार प्रविण दरेकर यांच्या रायगड प्रतिष्ठान व इतर सहकारी संस्थांच्या वतीने मुख्यमंत्री सहाय्यता निधीत ५५ लाखांच्या मदतीचे धनादेश मुख्यमंत्री देवेंद्र फडणवीस यांच्याकडे सुपूर्त करण्यात आले.
कॅबिनेट मंत्री प्रविण दरेकर यांच्या रायगड प्रतिष्ठानतर्फे चिकुवाडी बोरिवली येथे आयोजित रंग रास गरब्याला आज मुख्यमंत्री देवेंद्र फडणवीस यांनी भेट दिली. या प्रसंगी सांस्कृतिक मंत्री आशिष शेलार, आमदार संजय उपाध्याय, माजी आ. भाई गिरकर, रायगड प्रतिष्ठानचे आयोजक प्रकाश दरेकर, डॉ. यश प्रविण दरेकर, महावीर कन्स्ट्रक्शनचे पिनाकीन शहा, बाळा तावडे यांसह मोठ्या संख्येने पदाधिकारी, कार्यकर्ते आणि गरबा रसिक उपस्थित होते.
यावेळी नवरात्रीच्या शुभेच्छा देत मुख्यमंत्री फडणवीस म्हणाले कि, आई अंबेमातेला प्रार्थना करतो कि आपल्या सर्व मनोकामना पूर्ण कराव्यात. आपल्या सर्वांच्या जीवनात सुख समाधान, आरोग्य, ऐश्वर्य द्यावे व आपल्याला सन्मार्गाने चालण्याची प्रेरणा द्यावी. देशाचे पंतप्रधान नरेंद्र मोदी यांनी नवरात्रीच्या मुहूर्तावर १८ टक्के असलेला जीएसटी ५ टक्के करून आपल्याला मोठी भेट दिली आहे. आता स्वदेशी आणि आत्मनिर्भर भारत तयार करायचा आहे. या महोत्सवातही मराठवाड्यातील आपला शेतकरी महापुरामुळे अडचणीत आलाय त्याला दरेकर विसरले नाहीत. वेगवेगळ्या संघटनांच्या माध्यमातून ५५ लाख रुपये मुख्यमंत्री सहाय्यता निधीला दिले. त्याचा उपयोग निश्चितच शेतकऱ्यांसाठी केला जाईल, असेही मुख्यमंत्री फडणवीस म्हणाले.
अतिवृष्टीग्रस्तांना संस्थांचा मदतीचा हात
मुख्यमंत्री सहाय्यता निधीसाठी रायगड प्रतिष्ठानच्यावतीने ११ लाख, मुंबई डिस्ट्रिक्ट को-ऑपरेटिव्ह हाऊसिंग फेडरेशन लि. ५ लाख, मुंबई पूर्व उपनगर जिल्हा मजूर फेडरेशन ११ लाख, मुंबई पश्चिम जिल्हा उपनगर मजूर फेडरेशन ११ लाख, मुंबई शहर जिल्हा मजूर फेडरेशन ११ लाख, महावीर कन्स्ट्रक्शन पिनाकीन शाह यांनी ५ लाख ४ हजार तर अखिलेश चौबे यांनी १ लाखाचा धनादेश अतिवृष्टीग्रस्तांच्या मदतीसाठी मुख्यमंत्री फडणवीस यांच्याकडे सुपूर्द केले.