पंतप्रधान नरेंद्र मोदी यांच्या वाढदिवसानिमित्त राज्यात ७५ हजार तरुणांना कौशल्य प्रशिक्षण

 

 

मुंबई : पंतप्रधान नरेंद्र मोदी यांचा ७५ वा वाढदिवस अविस्मरणीय करण्यासाठी राज्यात ‘सेवा पंधरवडा’ उपक्रमांतर्गत १७ सप्टेंबर ते २ ऑक्टोबर २०२५ या कालावधीत ७५ हजार युवक व युवतींना कौशल्य प्रशिक्षण दिले जाणार आहे. ही माहिती कौशल्य, रोजगार, उद्योजकता व नाविन्यता विभागाचे मंत्री मंगलप्रभात लोढा यांनी दिली आहे. राज्यातील ४१९ औद्योगिक प्रशिक्षण संस्थांमध्ये (आयटीआय) या कालावधीत अल्पकालीन अभ्यासक्रमांचे आयोजन करण्यात आले असून, या अभ्यासक्रमातून तरुणांना स्वयंरोजगाराच्या संधी मिळणार आहेत. या अभ्यासक्रमांसाठी https://admission.dvet.gov.in या संकेतस्थळावर ऑनलाईन नोंदणी आवश्यक आहे.

या प्रशिक्षणासाठी सध्याच्या आयटीआय प्रशिक्षणार्थींना कोणतेही अतिरिक्त शुल्क आकारले जाणार नाही. नियमित वर्गांव्यतिरिक्त मिळालेल्या वेळेत हे अभ्यासक्रम घेतले जातील. विशेष म्हणजे, जे तरुण पूर्वी प्रशिक्षणापासून वंचित राहिले होते, त्यांना या उपक्रमामुळे नव्याने संधी मिळणार आहे.

१ ऑक्टोबर २०२५ रोजी राज्यातील सर्व आयटीआयमध्ये नवीन अभ्यासक्रमांचे औपचारिक उद्घाटन होणार आहे.

मंत्री लोढा म्हणाले, “या उपक्रमामुळे राज्यातील तरुणांच्या हातात कौशल्य येईल, रोजगाराच्या व उद्योजकतेच्या संधी निर्माण होतील आणि पंतप्रधान नरेंद्र मोदी यांच्या वाढदिवसाचे औचित्य साधून हा उपक्रम त्यांना समर्पित केला जाणार आहे.”

Leave a Reply

Your email address will not be published. Required fields are marked *