भाईंदर (प्रतिनिधी) : बारामती येथे झालेल्या राज्यस्तरीय शालेय कराटे स्पर्धेत मिरा-भाईंदर (पूर्व) येथील सेंट अलॉयसियस इंग्लिश हाय स्कूलचा कुशल विद्यार्थी विराज दास याने प्रथम क्रमांक पटकावत आपले शहर आणि शाळेचे नाव राज्यभर उज्ज्वल केले आहे.
सेंट अलॉयसियस इंग्लिश हाय स्कूलमध्ये विद्यार्थ्यांना शैक्षणिक गुणवत्तेसोबतच क्रीडा क्षेत्रातही प्रोत्साहन, मार्गदर्शन आणि दर्जेदार प्रशिक्षण दिले जाते. त्यामुळेच या शाळेतील विद्यार्थी राज्य व राष्ट्रीय स्तरावर सातत्याने उल्लेखनीय यश संपादन करत आहेत.
आठवीत शिक्षण घेत असलेला विराज दास कराटेचे अत्यंत कठोर व शिस्तबद्ध प्रशिक्षण घेत होता. त्याच्या जिद्द, परिश्रम आणि समर्पणाच्या जोरावर त्याने राज्यस्तरावर चमकदार कामगिरी करत प्रथम क्रमांक पटकावला आहे.
या उल्लेखनीय कामगिरीनंतर सेंट अलॉयसियस इंग्लिश हाय स्कूलतर्फे आज सकाळी भव्य रॅली काढून विराजचा विशेष सत्कार करण्यात आला. विद्यार्थी, शिक्षक आणि पालकांनी उत्साहाने सहभाग घेत शाळा परिसर जल्लोषाने भरून गेला.
कार्यक्रमादरम्यान शाळेचे मुख्याध्यापक व प्रशिक्षकांनी विराजचे मन:पूर्वक कौतुक केले.
“आमच्या सेंट अलॉयसियस इंग्लिश हाय स्कूलमध्ये क्रीडेवर विशेष भर दिल्यामुळेच आमचे विद्यार्थी राज्यस्तरीय आणि राष्ट्रीय स्तरावर मोठे यश मिळवत आहेत,” असे ते म्हणाले.
विराजच्या या भव्य यशामुळे संपूर्ण मिरा-भाईंदरमध्ये आनंदाचे वातावरण असून, शाळा, पालक, तसेच प्रशिक्षक यांच्या योगदानाचे विशेष कौतुक केले जात आहे.
मिरा-भाईंदरचा हा तारा—सेंट अलॉयसियसचा विराज—राष्ट्रीय व आंतरराष्ट्रीय स्तरावरही अवश्य चमकेल!