( प्रमोद देठे)- “मुंबई पोलीस दलातील अंमलदारांना शहरातच ५०० चौरस फुटांचे निवासस्थान मिळावे यासाठी प्रयत्न सुरू असून, भविष्यात कॉन्स्टेबल म्हणून नियुक्त होताच पोलिसांना घर मिळेल,” अशी महत्वाची ग्वाही मुंबईचे पोलीस आयुक्त देवेन भारती यांनी दिली.
जन सहयोग फाऊंडेशनतर्फे आयोजित गुणवंत विद्यार्थी सन्मान सोहळ्याच्या प्रसंगी ते बोलत होते. आझाद मैदान येथील प्रेरणा हॉल, पोलीस क्लबमध्ये हा कार्यक्रम मोठ्या उत्साहात पार पडला.
आयुक्त भारती म्हणाले,”अनेक पोलीस कर्मचारी डोंबिवली, कल्याणसारख्या दूरच्या उपनगरांतून प्रवास करत मुंबईत ड्युटी करतात. त्यांच्या घरच्यांनी खूप त्याग केला आहे. मात्र, मुंबईत घर मिळणे ही आजही मोठी समस्या आहे.”
त्यामुळे पोलीस विभागासाठी स्वतंत्र निवासी योजना राबवण्यात येणार असून, ती अंमलात आणण्यासाठी वरिष्ठ पातळीवर हालचाली सुरू आहेत, अशी माहिती त्यांनी दिली.
या कार्यक्रमात पोलीस दलातील ५० अंमलदारांच्या दहावीतील गुणवंत विद्यार्थ्यांचा सन्मान करण्यात आला. यामध्ये सारा चव्हाण, तनिष दागादखैर, मयुरेश पवार, कृतिका महाडिक, सिद्धी जाधव, आरव अधाटे आदी विद्यार्थ्यांचा समावेश होता.
या कार्यक्रमात दक्षता दाखवणाऱ्या अंमलदार रवींद्र पाटील व उपनिरीक्षक बाळू चव्हाण यांचाही विशेष सत्कार करण्यात आला.
व्यासपीठावर पोलीस आयुक्त देवेन भारती यांच्यासह, दक्षिण मुंबईचे अति. पोलीस आयुक्त डॉ. अभिनव देशमुख, क्राईम ब्रँचचे अति. आयुक्त धनंजय कुलकर्णी, जन सहयोग फाऊंडेशनचे अध्यक्ष प्रभाकर पवार आदी मान्यवर उपस्थित होते. कार्यक्रमाचे सूत्रसंचालन संदीप चोणकर यांनी केले.
नायगावमध्ये ऑलिम्पिक दर्जाचे स्पोर्ट्स सेंटर
विद्यार्थ्यांच्या शैक्षणिक आणि क्रीडाक्षेत्रातील प्रगतीसाठी आयुक्त भारती यांनी महत्त्वपूर्ण घोषणा केली. “पुढील तीन वर्षांत नायगावमध्ये ऑलिम्पिक साईज स्विमिंग पूलसह स्पोर्ट्स सेंटर उभारण्यात येईल. पोलिसांच्या मुलांना भविष्यात शैक्षणिक किंवा क्रीडा क्षेत्रात मागे राहू द्यायचं नाही,” असं ते म्हणाले.
जन सहयोग फाऊंडेशनतर्फे दरवर्षी गुणवंत विद्यार्थ्यांचा सत्कार करण्यात येतो. या उपक्रमातून पोलीस दलातील कुटुंबीयांमध्ये प्रेरणा आणि आत्मविश्वास वाढीस लागतो, असे मत उपस्थितांनी व्यक्त केले.
मुंबई पोलिसांसाठी घर, शिक्षण व क्रीडा सुविधा उभारण्याच्या या घोषणा, त्यांच्या कुटुंबीयांसाठी आशेचा किरण ठरणार आहेत.