मुंबई | ता. ०३ ऑक्टोबर: नवी मुंबई आंतरराष्ट्रीय विमानतळाला लोकनेते दि. बा. पाटील यांचेच नाव देण्यात येणार असल्याची अधिकृत घोषणा झाली असून, या नामकरणासाठी पंतप्रधान नरेंद्र मोदी यांनी सकारात्मक प्रतिसाद दिला आहे. याबाबत नुकतीच त्यांच्या भेटीची कार्यवाही पार पडली होती.
या पार्श्वभूमीवर मुख्यमंत्री देवेंद्र फडणवीस यांनी सह्याद्री अतिथीगृह, मुंबई येथे घेतलेल्या बैठकीत ही माहिती दिली. यासोबतच, पुणे येथील विमानतळाला ‘जगद्गुरु संत तुकाराम’ यांचे नाव, आणि छत्रपती संभाजीनगर येथील विमानतळाला ‘छत्रपती संभाजी महाराज’ यांचे नाव देण्याच्या प्रस्तावांनाही लवकरच केंद्र सरकारकडून मान्यता मिळेल, असे त्यांनी स्पष्ट केले.
मुख्यमंत्री फडणवीस म्हणाले, “राज्य शासनाच्या मागणीनुसार आणि नव्या धोरणानुसार तिन्ही नामविस्तारांना लवकरच मान्यता मिळेल. अन्य राज्यांचेही प्रस्ताव केंद्र सरकार विचाराधीन ठेवून आहे.”
नवी मुंबई विमानतळाच्या नामकरणासाठी झालेल्या आंदोलनांदरम्यान दाखल गुन्हे मागे घेण्याची कार्यवाही लवकरच केली जाणार आहे.
मुख्यमंत्री फडणवीस म्हणाले की, “या आंदोलनांमुळे अनेक तरुणांना नोकरी मिळण्यात अडचणी येत आहेत. त्यामुळे हे गुन्हे मागे घेण्यासाठी आवश्यक निर्देश दिले जातील. कोविड काळात दाखल झालेल्या गुन्ह्यांबाबतही न्यायालयाच्या परवानगीने त्यांचे निपटारे करण्यात येईल.”
या बैठकीत वनमंत्री गणेश नाईक यांनी स्वागतप्रस्ताव मांडला.
लोकनेते दि. बा. पाटील आंतरराष्ट्रीय विमानतळ नामकरण सर्वपक्षीय समितीचे अध्यक्ष दशरथ पाटील, माजी खासदार कपिल पाटील, खासदार सुरेश (बाळ्या) म्हात्रे, आमदार प्रशांत ठाकूर, आमदार मंदा म्हात्रे, माजी खासदार रामशेठ ठाकूर, तसेच आमदार रवींद्र चव्हाण यांनी आपल्या भूमिका मांडल्या.
याशिवाय, आमदार महेश बालदी, माजी खासदार संजय पाटील, संजिव नाईक, जगन्नाथ पाटील, राजू पाटील, सुभाष भोईर, जे.एम. म्हात्रे, जगदीश गायकवाड, दशरथ भगत, जे.डी. तांडेल यांच्यासह अनेक पदाधिकारी व कार्यकर्ते उपस्थित होते.