प्रमोद देठे – मिरा रोड येथील पार्क व्ह्यू बार अँड रेस्टॉरंटच्या अनधिकृत बांधकामावर अखेर आज (शुक्रवार) मिरा-भाईंदर महानगरपालिकेने तोडक कारवाई केली. २०१८ मध्ये भारतीय सैन्यातील एका मराठी जवानाला याच हॉटेलमध्ये मारहाण झाल्याच्या प्रकरणानंतर ‘मराठी एकीकरण समिती’ सातत्याने या हॉटेलविरोधात कारवाईची मागणी करत होती.
विशेष म्हणजे, समितीने दिलेल्या ‘झोपा काढा’ आंदोलनाच्या इशाऱ्यामुळे निर्माण झालेल्या दबावामुळे पालिकेने आंदोलन सुरू होण्याआधीच कारवाईला सुरुवात केली.
जवानावर झालेल्या मारहाणीचा निषेध — कारवाईला वेग
मिरा रोडच्या पार्क व्ह्यू हॉटेलमध्ये भारतीय जवानाला मारहाण झाल्याप्रकरणी समितीने तीव्र संताप व्यक्त केला होता.
अनधिकृत बांधकामाला न्यायालयातून प्रतिबंध हटूनही, तसेच विधी विभागाने स्पष्ट आदेश दिल्यानंतरही प्रभाग अधिकाऱ्यांकडून कारवाई टाळाटाळ होत असल्याचा आरोप समिती करत होती.
आंदोलनाचा धसका आणि तत्पर बारच्याअतिक्रमणवर कारवाई
आज दुपारी १ वाजता प्रभाग समिती क्र. ४ येथे आंदोलनाची घोषणा करण्यात आली होती.
मात्र, या आंदोलनाचा धसका घेत पालिकेच्या अतिक्रमण विभागाने दुपारपूर्वीच घटनास्थळी पोहोचून अनधिकृत बांधकामावर तोडक कारवाई केली.
“सीमेवर देशाचे रक्षण करणाऱ्या जवानावर हल्ला करणाऱ्यांवर कारवाई करणे तर दूरच, उलट त्याच हॉटेलचे अनधिकृत बांधकाम वर्षानुवर्षे कायम ठेवले होते. आमच्या आंदोलनाच्या इशाऱ्यानंतरच प्रशासन जागे झाले. हा मराठी एकजुटीचा विजय आहे,” अशी प्रतिक्रिया मराठी एकीकरण समितीच्या पदाधिकाऱ्यांनी दिली.
प्रभाग अधिकाऱ्यांवर कारवाईची मागणी
कारवाई विलंबित ठेवून कर्तव्यात कसूर केल्याप्रकरणी
प्रभाग अधिकारी स्वप्नील सावंत व संबंधित कर्मचाऱ्यांना तात्काळ निलंबित करण्याची मागणी समितीने पत्राद्वारे केली आहे.
२०१८ पासून सातत्यपूर्ण पाठपुरावा
समिती २०१८ पासून या प्रकरणात सक्रिय असून,पोलिस तपास,
आरोपींची अटक,उर्वरित फरार आरोपींचा शोध यावरही सातत्याने लक्ष ठेवून आहे असे मराठी एकीकरण समिती चे पदाधिकारी प्रमोद पार्टे व सचिन घरत यांनी सांगितले