मिरा-भाईंदर | प्रतिनिधी : महाराष्ट्र नवनिर्माण सेनेच्या कामगार आघाडीने मिरा-भाईंदर महानगरपालिकेवर काढलेला महामोर्चा यशस्वी ठरला आहे. कंत्राटी कामगारांच्या विविध प्रलंबित मागण्यांसाठी आज महापालिकेवर मोठ्या संख्येने मनसेच्या कार्यकर्त्यांनी धडक दिली. या आंदोलनाचे नेतृत्व महाराष्ट्र नवनिर्माण महापालिका कामगार कर्मचारी सेनेचे अध्यक्ष श्री. अभिनंद चव्हाण यांनी केले.
या आंदोलनाच्या पार्श्वभूमीवर महापालिका प्रशासनाने अनेक महत्त्वपूर्ण मागण्या मान्य करत लेखी आश्वासन दिले. त्यानुसार, १३ मयत कामगारांची ग्रॅच्युइटी रक्कम थेट त्यांच्या खात्यावर जमा करण्यात आली आहे, तर उर्वरित सेवानिवृत्त, मयत व आजारी कामगारांची ग्रॅच्युइटी एक महिन्याच्या आत जमा केली जाईल, असे प्रशासनाने स्पष्ट केले.
वृक्ष प्राधिकरण विभागातील कंत्राटी कामगारांच्या सुट्टीच्या रकमेचा भरणा येत्या १५ ऑक्टोबर रोजी करण्यात येणार आहे. तसेच स्मशानभूमी, अग्निशमन विभाग आणि औषध फवारणी करणाऱ्या कामगारांचा पगार प्रत्येक महिन्याच्या १० तारखेपर्यंत देण्यात येईल, अशी लेखी हमीही यावेळी देण्यात आली.
गार्डन विभागातील कंत्राटी कामगारांच्या सुट्टीचे पैसे त्यांच्या खात्यावर जमा करण्यात आले आहेत, आणि जुन्या ठेकेदारांच्या मार्फत उर्वरित रक्कम लवकरच अदा केली जाईल, अशी माहिती महापालिकेचे अतिरिक्त आयुक्त श्री. संभाजी पानपट्टे यांनी मनसे शिष्टमंडळाला दिली.
या आंदोलनात मनसेचे अनेक पदाधिकारी आणि कार्यकर्ते मोठ्या संख्येने सहभागी झाले होते. यामध्ये मनसे उपजिल्हाध्यक्ष हेमंत सावंत, विधानसभा अध्यक्ष सचिन पोपळे, महिला विधानसभा अध्यक्षा वैशाली येरुणकर, विद्यार्थी सेना शहराध्यक्ष रॉबर्ट डिसोझा, शहर सचिव सूर्या पवार, तसेच अतुल पटवर्धन, हरेश शिप्रे, सुनील पवार, शेखर गजरे, रमाकांत माळी, हरेश सुतार, निलेश परमार, सतीश काळे, विपीन मिश्रा, विजय भगत, चंद्रशेखर जाधव, भरत करचे, विलाश साईल, मुकेश उन्हाळे, विशाल राऊत, रमेशचंद्र चव्हाण यांचा सहभाग होता.
मनसेच्या या यशस्वी आंदोलनामुळे कंत्राटी कामगारांच्या न्याय्य मागण्यांना बळ मिळाले असून, मनपाच्या दुर्लक्षित कर्मचाऱ्यांना दिलासा मिळाला आहे. संघटनेच्या संयोजकतेतून हा लढा यशस्वी ठरल्याने कामगारांमध्ये समाधानाचे वातावरण आहे.