भाईंदर – मिरा-भाईंदर महानगरपालिका क्षेत्रातील बालयोगी सदानंद क्रीडा मंडळातील किशोरी आणि किशोर गटाने कबड्डी या खेळात उल्लेखनीय कामगिरी करत मुंबई उपनगर निवड चाचणी स्पर्धेत मानांकन पटकावले आहे. या यशामुळे शहरातील क्रीडा क्षेत्रात नवचैतन्य निर्माण झाले आहे.
या उत्कृष्ट कामगिरीबद्दल बुधवार, दिनांक २९ ऑक्टोबर २०२५ रोजी मिरा-भाईंदर महानगरपालिका आयुक्त तथा प्रशासक मा. राधाबिनोद अ. शर्मा (भा.प्र.से.) यांनी सर्व खेळाडूंचे मनःपूर्वक अभिनंदन केले.
आयुक्त शर्मा यांनी खेळाडूंना शुभेच्छा देताना सांगितले की, “महानगरपालिकेमार्फत कबड्डी सोबतच इतर सर्व क्रीडा प्रकारांनाही योग्य प्रोत्साहन व सहकार्य दिले जाईल. क्रीडा संस्कृतीचा विकास आणि युवा खेळाडूंचे प्रोत्साहन हे महानगरपालिकेचे प्राधान्य असून, यामुळे शहरात निरोगी आणि उत्साही वातावरण निर्माण होईल.”