भाईंदर (प.) – मिरा-भाईंदर महानगरपालिकेने शहरातील सार्वजनिक जागा व पदपथ मोकळे करण्याच्या मोहिमेला गती देत भाईंदर पश्चिम स्टेशन रोड परिसरातील अनधिकृत छपरे, हातगाड्या आणि शाळांच्या १०० मीटर परिसरातील पानटपऱ्यांवर मोठ्या प्रमाणात कारवाई केली.
दिनांक १५ ऑक्टोबर २०२५ रोजी झालेल्या या कारवाईत, ९ अनधिकृत पानटपऱ्या आणि अनेक हातगाड्या हटविण्यात आल्या. तसेच गाळ्यासमोरील छपरे आणि बांधकामे पाडण्यासाठी जेसीबी यंत्रणेचा वापर करण्यात आला.
महानगरपालिकेच्या अतिक्रमण निर्मूलन विभागामार्फत ही कारवाई करण्यात आली. या मोहिमेचा उद्देश शहरातील पदपथ आणि सार्वजनिक जागा नागरिकांसाठी मोकळ्या ठेवणे, तसेच शाळांच्या परिसरात तंबाखूजन्य पदार्थांची विक्री रोखणे हा आहे.
ही कारवाई मा. आयुक्त तथा प्रशासक राधाबिनोद अ. शर्मा (भा.प्र.से.) यांच्या निर्देशानुसार करण्यात आली. त्यांच्या मार्गदर्शनाखाली अतिरिक्त आयुक्त संभाजी पानपट्टे आणि उपायुक्त (अतिक्रमण विभाग) कल्पिता पिंपळे यांच्या नेतृत्वाखाली ही मोहीम राबविण्यात आली.
यासंदर्भातील झालेल्या आढावा बैठकीत उपायुक्त पिंपळे यांनी सर्व प्रभाग अधिकाऱ्यांना अनधिकृत बांधकामे, फेरीवाले, झोपड्या, गॅरेजेस आणि होर्डिंग्जवर तातडीने कारवाई करण्याचे निर्देश दिले होते. त्यानुसार प्रभाग समिती क्रमांक ०२ अंतर्गत व्यापक कारवाई पार पडली.
या कारवाईदरम्यान महानगरपालिकेचे अधिकारी, कर्मचारी तसेच पोलीस विभागाचे अधिकारी व कर्मचारी उपस्थित होते.
महानगरपालिका नागरिकांना आवाहन करते की,
> “सार्वजनिक जागांवर अतिक्रमण करू नये. शहर स्वच्छ, सुरक्षित आणि सुव्यवस्थित ठेवणे ही प्रत्येक नागरिकाची जबाबदारी आहे.”
महानगरपालिकेने स्पष्ट केले आहे की, शहरातील अतिक्रमण निर्मूलनासाठी सतत आणि अधिक व्यापक पातळीवर कारवाई सुरूच राहणार आहे.