मिरा-भाईंदर – शहरातील आजारी, जखमी तसेच मृत प्राण्यांच्या ने-आण व उपचारासाठी मिरा-भाईंदर महानगरपालिका पशुवैद्यकीय विभागातर्फे विशेष ‘प्राणी रुग्णवाहिका’ (मोबाईल व्हॅन) सेवेला १८ नोव्हेंबर २०२५ पासून सुरुवात करण्यात आली. या सेवेचे लोकार्पण मनपा आयुक्त तथा प्रशासक राधाबिनोद अ. शर्मा (भा.प्र.से.) यांच्या हस्ते करण्यात आले.
शहरात रस्त्यावर जखमी किंवा आजारी प्राणी आढळल्यास त्यांच्या उपचारांची व्यवस्था करण्यासाठी नागरिकांना मोठ्या अडचणींना सामोरे जावे लागत होते. हीच समस्या लक्षात घेऊन मनपाकडून ही अत्यावश्यक सेवा सुरू करण्यात आली आहे. या रुग्णवाहिकेद्वारे प्राण्यांना सुरक्षितरीत्या उचलणे, ने-आण करणे तसेच तातडीने उपचारासाठी पशुवैद्यकीय विभागाकडे पोहोचवणे शक्य होणार आहे.
लोकार्पण सोहळ्याप्रसंगी अतिरिक्त आयुक्त प्रियांका राजपूत, उपायुक्त (मुख्यालय) डॉ. सचिन बांगर, नगरसचिव दिनेश कानगुडे, शहर अभियंता दिपक खांबित, माहिती व जनसंपर्क अधिकारी राजकुमार घरत, सहाय्यक आयुक्त जितेंद्र कांबळे, पशुवैद्यकीय अधिकारी विक्रम निराटले तसेच इतर मनपा अधिकारी उपस्थित होते.
या उपक्रमामुळे शहरातील प्राणी संरक्षण व कल्याणाशी संबंधित उपयोजनांना मोठी चालना मिळणार असून नागरिकांसाठीही ही सेवा मोठा दिलासा ठरणार आहे.