मुंबई – आज आपल्यासमोर सर्वात मोठे आव्हान आपण जो माल बनवतो तो विकायचा कुठे हे आहे. कोरोना काळात ऑनलाईन खरेदीला सुरुवात झाली. ग्राहकांची ही मानसिकता बदलायला लागणार आहे. बदलत्या मानसिकतेत बचत गटांना व्यवसायात टिकायचे असेल तर मार्केटिंग महत्वाचे आहे, असा सल्ला महिला व बालकल्याण विकास मंत्री आदिती तटकरे यांनी महिलांना दिला. त्या मुंबई बँकेमार्फत आयोजित मुंबई बँक महिला कक्ष आणि मार्केटिंग अँड बिझनेस डेव्हलपमेंट मल्टीपर्पज सेंटरच्या उदघाटन प्रसंगी बोलत होत्या.
या कार्यक्रमाच्या अध्यक्षस्थानी मुंबई बँकेचे व महाराष्ट्र गृहनिर्माण स्वयं/समूह पुनर्विकास प्राधिकरणाचे अध्यक्ष आमदार प्रविण दरेकर हे होते. याप्रसंगी मुंबई बँकेचे संचालक आ. प्रसाद लाड, उपाध्यक्ष सिद्धार्थ कांबळे, संचालक प्रकाश दरेकर, नंदकुमार काटकर, जिजाबा पवार, आनंदराव गोळे, नितीन बनकर, विष्णू घुमरे, अनिल गजरे, जयश्री पांचाळ, कविता देशमुख, शिल्पा सरपोतदार, राष्ट्रवादीचे सरचिटणीस संजय तटकरे, बँकेचे कार्यकारी संचालक डी.एस.कदम, मुख्य सरव्यवस्थापक संदीप सुर्वे यांसह मोठ्या संख्येने महिला उपस्थित होत्या.
यावेळी उपस्थित महिलांना मार्गदर्शन करताना मंत्री आदिती तटकरे म्हणाल्या कि, मुंबई जिल्हा बँक ही नेहमीच महिलांच्या प्रश्नासाठी अग्रेसर असते. बचत गट स्थापन करणे सोपे असते मात्र तो चालू ठेवणे मोठे जिकरीचे असते. आज आपल्यासमोर सर्वात मोठे आव्हान आपण जो माल बनवतो तो विकायचा कुठे हे आहे. कोरोना काळात ऑनलाईन खरेदीला सुरुवात झाली. ग्राहकांची ही मानसिकता बदलायला लागणार आहे. बदलत्या मानसिकतेत बचत गटांना व्यवसायात टिकायचे असेल तर मार्केटिंग महत्वाचे आहे. बचत गटांचा व्यवसाय सोशल मीडियामार्फत लोकांपर्यंत पोचत नाही तोपर्यंत त्याची मार्केटिंग होणार नाही, असेही आदिती तटकरे म्हणाल्या.
त्या पुढे म्हणाल्या कि, ज्यावेळी लाडकी बहीण योजनेसाठी बँकांनी शून्य बॅलन्स खाती उघडली त्यात मुंबई बँक होती. ईकेवायसी ही तुमची योजना कायमस्वरूपी राहण्यासाठी करावी लागणार आहे. दोन कोटी चाळीस लाख महिला लाभार्थ्यांपैकी दीड कोटी महिलांनी ईकेवायसी केले आहे. याद्वारे केंद्राच्या योजनाही तुम्हाला लागू होणार आहेत. विरोधक या योजनेवर टीका करायचे, योजना बंद होणार सांगायचे. मात्र कुणाचाही लाभ बंद होणार नाही. मुंबई बँकेने लाडक्या बहिणींसाठी बिनव्याजी कर्ज धोरण आणले आहे. या योजनेच्या कार्यवाहीसाठी माझ्या सहीचे पत्र आण्णासाहेब आर्थिक विकास महामंडळ, ओबीसी आणि भटक्या विमुक्त महामंडळाच्या अधिकाऱ्यांना जाईल. जर महामंडळाचे अधिकारी दिरंगाई करत असतील तर कडक कारवाई करण्याचा निर्णय घेऊ. महिलांचा मतांसाठी वापर करायचा नाही तर ज्यांच्या आशीर्वादातून हे महायुतीचे सरकार आलेय त्यांना अधिकाधिक सक्षम कसे करता येईल यासाठी महायुती सरकार काम करेल, असेही मंत्री आदिती तटकरे यांनी आश्वस्त केले.
तत्पूर्वी आ. प्रविण दरेकर मार्गदर्शन करताना म्हणाले कि, महिलांसंदर्भात भविष्याच्या, उद्योग-व्यवसायाच्या दृष्टीने मुंबई बँक काम करत आलीय. मुंबई बँक सर्वसामान्यांची आहे. सामाजिक बांधिलकीची जाणीव ठेवून मुंबई बँक काम करतेय. ज्यावेळी कोणी मदत करत नाही त्यावेळी जिल्हा बँक नियम डावलून भावना समजून आपल्या मदतीला धावली आहे. हे करत असताना वेगवेगळ्या नावीन्यपूर्ण योजना घेऊन आपल्या समोर आलोत. मुंबईत स्वयं पुनर्विकास हा विषय आणला. त्यातून १६ इमारती विना विकासकाशिवाय उभ्या केल्या. हे करत असताना माझ्या अध्यक्षतेखाली समिती झाली. समितीचा अहवाल शासनाला दिला. ज्या मागण्या मांडल्या होत्या त्या सर्व मान्य झाल्या. त्यात स्वयं पुनर्विकासाचे प्राधिकरण करावे ही प्रमुख मागणी होती. सरकारने तो निर्णय करत मला त्या प्राधिकरणाचा अध्यक्ष केले आणि मंत्रिपदाचा दर्जा दिला. अशाच प्रकारे लाडक्या बहिणींसाठी सरकारने १५०० रुपये देण्याचा निर्णय घेतला. त्यावेळी लाखभार लाडक्या बहिणींसाठी झिरो बॅलन्स खाती मुंबई बँकेत उघडली. आज ज्या महिला कक्षाचे उदघाटन झाले त्याचा उद्देश जे बिनव्याजी एक लाखाचे कर्ज घेतो त्या कर्जसाठी एलवाय जनरेटर करायचा असतो त्याचे मार्गदर्शन येथे होणार आहे. जेणेकरून जास्त महिला या बिनव्याजी कर्ज योजनेचा लाभ घेऊ शकतील.
दरेकर पुढे म्हणाले कि, राज्याच्या सर्वोच्च प्रमुखांनी आदेश देऊनही
आण्णासाहेब आर्थिक विकास महामंडळ, ओबीसी आणि भटक्या विमुक्त महामंडळानी बिनव्याजी कर्ज योजनेवर कार्यवाही केलेली नाही. तिन्ही मंडळाच्या अधिकाऱ्यांना निर्देश द्यावेत अशी मागणीही दरेकर यांनी मंत्री आदिती तटकरे यांना केली. तसेच राज्याच्या मुख्यमंत्र्यांची इच्छा आहे महिला अर्थव्यवस्थेत आल्या पाहिजेत. पंतप्रधान नरेंद्र मोदी आपला देश जगात तिसरी अर्थव्यवस्था बनवू पाहताहेत. महाराष्ट्राशिवाय हे शक्य नाही. महाराष्ट्र आर्थिकदृष्ट्या सक्षम होईल त्याचवेळी देशही आर्थिकदृष्ट्या मजबूत होईल.
दरम्यान, यावेळी आ. प्रविण दरेकर यांच्या वाढदिवसाचे औचित्य साधून महिलांना मुख्यमंत्री माझी लाडकी बहीण योजने अंतर्गत बिनव्याजी कर्जाच्या धनादेशाचे वाटपही करण्यात आले.