नालासोपारा ( प्रमोद देठे) – परिमंडळ ६ च्या पथकाने अंमली पदार्थ उत्पादन व विक्री करणाऱ्या टोळीविरुद्ध मोठी कारवाई करत पालघर जिल्ह्यातील नालासोपारा (पेल्हार) येथील एका गुप्त कारखान्यावर छापा टाकला. या कारवाईत एकूण रु.१३ कोटी ४४ लाख ५३ हजार ७०० किंमतीचा मेफेड्रोन (एम.डी.) अंमली पदार्थ, कच्चा माल आणि उत्पादनासाठी लागणारे साहित्य जप्त करण्यात आले.
५ ऑक्टोबर रोजी परिमंडळ ६ मधील पथकास माहिती मिळाली की, एक इसम अंमली पदार्थ विक्रीसाठी येणार आहे. या माहितीनुसार सापळा रचून पोलिसांनी संशयिताला ताब्यात घेतले. तपासादरम्यान त्याच्याकडून ५७.८४ ग्रॅम एम.डी. हा अंमली पदार्थ सापडला. या प्रकरणी टिळकनगर पोलिस ठाण्यात गुन्हा क्रमांक ४६२/२०२५, कलम ८(क) सह २२ एन.डी.पी.एस. कायद्यान्वये गुन्हा दाखल करण्यात आला.
तपासाच्या दरम्यान पोलिसांनी अटक आरोपीकडून मिळालेल्या माहितीनुसार मुंबई आणि मिरा रोड येथून अंमली पदार्थ विक्रीत सहभागी असलेल्या आणखी चार जणांना अटक केली. पुढील तपासात या टोळीने पेल्हार, नालासोपारा (ता. वसई, जि. पालघर) येथील रशीद कंपाउंड, खैरपाडा, भावखळ परिसरात मेफेड्रोनचे उत्पादन चालवले असल्याचे उघड झाले.
तेथे छापा टाकताच पोलिसांनी ०६ किलो ६७५ ग्रॅम एम.डी. अंमली पदार्थ, तसेच कच्चा माल आणि उत्पादनासाठी लागणारी उपकरणे असा एकूण रु.१३,३८,५३,७०० किंमतीचा मुद्देमाल जप्त केला. उत्पादन करणाऱ्या मुख्य आरोपीसह एकूण पाच आरोपींना अटक करण्यात आली असून पुढील तपास सुरू आहे.
ही कारवाई पोलीस आयुक्त देवेन भारती, अतिरिक्त पोलीस आयुक्त सत्यनारायण चौधरी, अपर पोलीस आयुक्त (पूर्व विभाग) डॉ. महेश पाटील आणि परिमंडळ ६ चे पोलीस उपायुक्त समीर शेख यांच्या मार्गदर्शनाखाली करण्यात आली.
कारवाईत सहाय्यक पोलीस आयुक्त आबुराव सोनावणे, प्रभारी पोलीस अधीक्षक श्रीमती मनिषा कुलकर्णी, सपोनि. मैत्रानंद खंदारे, विलास पवार, पोउनि. विजयसिंह देशमुख, सुशांत साळवी, अजय गोल्हार आणि पथकातील इतर पोलिस कर्मचारी — राणे, आखाडे, भिलारे, सावंत, उपाध्ये, दिवटे, पुंजारी, केदार, भिसे, झिणे, राउत, सानप, नागरगोजे, काटकर, काशिद यांनी सहभाग घेतला.