मुंबई : महाराष्ट्र राज्य जीएसटी विभागाने मोठी कारवाई करत तब्बल ३०.५२ कोटी रुपयांच्या करचुकवेगिरी प्रकरणात दोन जणांना अटक केली आहे. अटकेत आलेल्यांमध्ये देवरा एक्झिम एलएलपी या फर्मचे भागीदार मेहुल जैन आणि ऑपरेटर कमलेश जैन यांचा समावेश आहे.
विभागाच्या तपासात या दोघांनी कोणताही प्रत्यक्ष व्यापार न करता बनावट व्यवहार दाखवून चुकीची इनपुट टॅक्स क्रेडिट (ITC) वजावट केल्याचे उघड झाले आहे. या प्रकारामुळे शासनाच्या महसुलाला मोठा आर्थिक फटका बसला आहे, अशी माहिती महाराष्ट्र राज्यकर विभागाकडून देण्यात आली आहे.
या प्रकरणी न्यायालयात हजर करण्यात आलेल्या आरोपींना ४ सप्टेंबर २०२५ पर्यंत न्यायालयीन कोठडी सुनावण्यात आली आहे.
ही कारवाई राज्यकर विभागाचे सहआयुक्त श्री. संजय पवार आणि उपायुक्त श्रीमती स्वप्नाली जाधव यांच्या मार्गदर्शनाखाली पार पडली. तपास पथकात सतीश पाटील, शरदचंद्र पोहनकर, भूपेन्द्र वळवी आणि मनोहर कनकदंडे यांचा समावेश होता.
राज्यकर विभागाने या कारवाईत आधुनिक नेटवर्क विश्लेषण प्रणाली आणि इतर शासकीय यंत्रणांशी समन्वय साधून कार्यवाही केली आहे. हा प्रकार महाराष्ट्र वस्तू व सेवा कर कायदा, २०१७ आणि त्यासंदर्भातील नियमांचे स्पष्ट उल्लंघन असल्याचे विभागाने स्पष्ट केले.
महाराष्ट्रात बनावट ITC वजावटीमुळे होणाऱ्या महसूल हानीच्या घटनांवर अंकुश ठेवण्यासाठी राज्यकर विभागाने कठोर भूमिका घेतली असून, अशा प्रकरणांमध्ये निर्धारपूर्वक व कायदेशीर कारवाई केली जाईल, असा इशाराही यावेळी देण्यात आला आहे.