लोणावळा : नगरपरिषद सार्वत्रिक निवडणुकीच्या पार्श्वभूमीवर लोणावळ्यात राजकीय वातावरण तापले असून, भाजपाचे गटनेते व आमदार प्रविण दरेकर यांनी आज शहरात प्रचाराचा धडाका लावला. नगराध्यक्ष पदाचे उमेदवार गिरीश कांबळे, तसेच प्रभाग क्र. ५ मधील उमेदवार बिंद्रा गणात्रा आणि सुभाष डेनकर यांच्या प्रचारार्थ त्यांनी विविध भागात जनसंपर्क साधला.
दरेकर यांनी कालेकर मळा, नांगरगाव, नांगरगाव गावठाण, आदर्श कॉलनी आणि शिक्षक कॉलनी येथे नागरिकांशी संवाद साधत पक्षाच्या उमेदवारांना पाठिंबा देण्याचे आवाहन केले. नांगरगाव दत्तमंदिर येथे ज्येष्ठ नागरिकांची भेट घेऊन कमळाचे बटण दाबून भाजपाला विजयी करा, असे आवाहन त्यांनी केले.
प्रचारादरम्यान दरेकर यांनी नगराध्यक्ष पदाचे उमेदवार गिरीश कांबळे यांच्यासह इतर उमेदवारांना शुभेच्छा दिल्या. स्थानिक कार्यकर्त्यांच्या उपस्थितीमुळे प्रचाराला उत्साहाचे वातावरण लाभले.