मुंबई – ‘एकमेका सहाय्य करू अवघे धरू सुपंथ’ या उक्तीप्रमाणे एकत्रितपणे सहकारातील पैसा सहकारात आला पाहिजे. सर्व व्यवसाय सहकारात केले तर सुगीचा तो दिवस लांब नाही. एकमेकांना विश्वासात घेऊन सहकारचा हा रथ पुढे नेऊया, एकमेकांच्या संवादातून, समन्वयातून सहकार बळकट करूया. सरकारच्या माध्यमातून सहकार वाढीसाठी जे करता येईल ते करीन, असा विश्वास भाजपा गटनेते, मुंबई बँकेचे अध्यक्ष आमदार प्रविण दरेकर यांनी व्यक्त केला.
माटुंगा-माहीम येथील यशवंत नाट्यमंदिर येथे आज मुंबई जिल्हा बँकेची ५१ वी वार्षिक सर्वसाधारण सभा पार पडली. यावेळी आपल्या अध्यक्षीय भाषणात दरेकर बोलत होते. याप्रसंगी बँकेचे उपाध्यक्ष सिद्धार्थ कांबळे, सहकारातील ज्येष्ठ नेते शिवाजीराव नलावडे, आमदार व संचालक प्रसाद लाड, संचालक प्रकाश दरेकर, नंदकुमार काटकर, नितीन बनकर, विठ्ठल भोसले, विष्णू घुमरे, संदीप घनदाट, पुरुषोत्तम दळवी, आनंदराव गोळे, जिजाबा पवार, संचालिका कविता देशमुख, जयश्री पांचाळ, बँकेचे कार्यकारी संचालक डी. एस. कदम, बँकेचे मुख्य सरव्यवस्थापक संदीप सुर्वे यांसह मोठ्या संख्येने कर्मचारी, सभासद उपस्थित होते.
यावेळी उपस्थितांना मार्गदर्शन करताना मुंबई बँकेचे अध्यक्ष आमदार प्रविण दरेकर म्हणाले कि, आज राज्यातील सहकाराची अत्यंत वाईट अवस्था आहे. खऱ्या अर्थाने सहकाराला दिशा, उर्जितावस्था देण्याची गरज आहे. राज्य संघाचा अध्यक्ष म्हणून पहिलीच बैठक चार तास घेतली. बैठकीत बारकाईने राज्यातील सहकाराच्या अडचणी काय आहेत, शिक्षण-प्रशिक्षणाच्या अडचणी काय आहेत, संस्था अडचणीत का आहेत, त्यांना ताकद देण्यासाठी सरकार दरबारी काय केले पाहिजे, अशा वेगवेगळ्या संकल्पना मनात आहेत. येणाऱ्या काळात या सर्व संकल्पना राबवून कधीकाळी जी सहकाराची, महाराष्ट्राची वैभवशाली परंपरा होती तीला पुन्हा गतवैभवाचे दिवस आणण्यासाठी आता मुंबईकर पुढाकार घेतील, असेही दरेकर म्हणाले.
ते पुढे म्हणाले कि, महाराष्ट्राच्या ग्रामीण भागात सहकार चळवळ मजबूत होती. पण आता आपण मुंबईकरांनी महाराष्ट्राच्या सहकार चळवळीला मार्गदर्शन करण्याची वेळ आली आहे. मुंबईच्या अर्थव्यवस्थेवर आपल्या बँकिंग, पतसंस्थांचे वर्चस्व राहिले पाहिजे. खासगी बँका येतात आणि या देशाच्या आर्थिक राजधानीत व्यवसाय करतात. आपण आपले स्वतःचे स्थान भक्कम व्हावे व मुंबईच्या अर्थव्यवस्थेवरही सहकाराचा पगडा असावा अशा प्रकारचा माझा मानस असल्याचेही दरेकर म्हणाले. तसेच राज्यात प्रतिकूल परिस्थितीत आपल्या सर्वांना अभिमान वाटेल अशा प्रकारचा १५ हजार कोटींचा टप्पा पार पडणारी मुंबई जिल्हा मध्यवर्ती बँक असल्याचेही दरेकरांनी म्हटले.