मुंबई – ग्रँट रोड विभागातील अलिभाई प्रेमजी मार्ग येथील स्वराज प्रतिष्ठान श्री साईनाथ युवा मित्र मंडळाने यंदा नवरात्रोत्सवानिमित्त कोल्हापूरच्या महालक्ष्मी अंबाबाई देवीची प्रतिकृती साकारली आहे. या दिव्य मूर्तीच्या दर्शनासाठी रोज शेकडो भाविक मोठ्या श्रद्धेने गर्दी करत आहेत.
हे मंडळ यंदा आपल्या ४० व्या वर्षात पदार्पण करत आहे. गेल्या अनेक वर्षांपासून देवीच्या विविध पौराणिक स्वरूपांचे दर्शन देणाऱ्या या मंडळाची नावाजलेली सजावट आणि सामाजिक बांधिलकी ही खास वैशिष्ट्ये ठरली आहेत.
मूर्तीकार सुनिल भोसले (ग्रँट रोड) यांनी अत्यंत बारकाव्यांसह ही प्रतिकृती साकारली असून, देवीची वेशभूषा सचिन घुगे यांनी केली आहे. मंडळाचे अध्यक्ष डॉ. दिलीप नागरे यांनी सांगितले की, “जे भाविक कोल्हापूरला जाऊ शकत नाहीत, त्यांना मुंबईतच अंबाबाई देवीचे दर्शन मिळावे हा यामागचा हेतू आहे.”
मंडळाच्या वतीने नवरात्रोत्सवात महाप्रसाद, जागरण-गोंधळ, विद्यार्थ्यांना शालेय मदत, तसेच गरजू कुटुंबांना आर्थिक सहकार्य असे विविध सामाजिक उपक्रम राबवले जातात. अनिल नागरे, मंडळाचे प्रमुख कार्यकर्ते, यांनी सांगितले की दरवर्षीप्रमाणे यंदाही भाविकांचा प्रतिसाद अत्यंत उत्स्फूर्त आहे.