मुंबई – मालाड–मालवणी परिसरातील वाढत्या अतिक्रमणाच्या समस्येबाबत मंत्रालयात आज उच्चस्तरीय बैठक घेण्यात आली. या बैठकीत वरिष्ठ पोलीस अधिकारी, बृहन्मुंबई महानगरपालिका (BMC), म्हाडा, महिला व बालविकास विभागाचे अधिकारी तसेच स्थानिक रहिवासी उपस्थित होते.
बैठकीत परिसरातील अतिक्रमणामुळे नागरिकांना भेडसावणाऱ्या अडचणींवर सविस्तर चर्चा झाली. अतिक्रमण करणाऱ्यांविरुद्ध तत्काळ गुन्हे दाखल करून कठोर कारवाई करण्याचे निर्देश यावेळी देण्यात आले. संबंधित सर्व विभागांनी परस्पर समन्वयाने काम करून परिसर अतिक्रमणमुक्त करण्यावर भर द्यावा, असेही निर्देश देण्यात आले.तसेच जिर्णावस्थेत असलेल्या अंगणवाड्यांचे पुनरुज्जीवन करण्यासंबंधी आवश्यक उपाययोजना करण्याचे आदेशही देण्यात आले.या बैठकीनंतर प्रशासनाकडून तातडीने कारवाई होण्याची अपेक्षा नागरिकांनी व्यक्त केली आहे.