मुंबई – भाजपा मुंबई अध्यक्ष आमदार अमित साटम यांनी मंगळवारी विधानपरिषद गटनेते आमदार प्रविण दरेकर यांच्या रायगड प्रतिष्ठान आयोजित नवरात्रौत्सव आणि भव्य ‘रंग रास’ गरबा महोत्सवाला भेट देऊन गरबा प्रेमींचा उत्साह वाढविला. यावेळी त्यांनी आगामी काळात पंतप्रधान नरेंद्र मोदी यांच्या नेतृत्वाखाली भारत स्वावलंबी आणि आत्मनिर्भर बनो, असे साकडे आई जगदंबेला घातले.
रायगड प्रतिष्ठानच्या वतीने दरवर्षी चिकूवाडी, बोरीवली पश्चिम येथील स्व. बाळासाहेब ठाकरे मनोरंजन मैदानात ‘रंग रास’ गरब्याचे आयोजन केले जाते. बॉलिवूडच्या प्रसिद्ध गायिका भूमी त्रिवेदी यांच्या सुमधुर आवाजावर गरबा प्रेमी मग्न होऊन थिरकताना दिसतात. यंदाही मोठ्या उत्साहात रायगड प्रतिष्ठानतर्फे नवरात्र उत्सवाचे आयोजन करण्यात आले आहे. आज दुसऱ्या माळेला भाजपा मुंबई अध्यक्ष आमदार अमित साटम यांनी उत्सवाला भेट दिली. यावेळी साटम यांनी आई जगदंबेचे मनोभावे दर्शन घेतले. आ. दरेकर यांनी शाल, श्रीफळ आणि सन्मानचिन्ह देऊन अमित साटम यांचा यथोचित सत्कार केला. यावेळी उपस्थित गरबा प्रेमीना नवरात्रीच्या शुभेच्छा देत अमित साटम म्हणाले कि, आगामी काळात पंतप्रधान नरेंद्र मोदी यांच्या नेतृत्वाखाली भारत स्वावलंबी आणि आत्मनिर्भर बनो. आपण सर्वजण विकसित भारत बनण्याच्या मार्गावर पुढे जाऊ, अशी मी आई जगदंबेच्या चरणी प्रार्थना करतो.
यावेळी स्थानिक आमदार संजय उपाध्याय, जिल्हा अध्यक्ष बाळा तावडे, गणेश खणकर, निखिल व्यास, अमर शहा, अविनाश राय, रायगड प्रतिष्ठानचे यश दरेकर, प्रकाश दरेकर, पिनाकीन शहा, आदित्य दरेकर यांसह आदी मान्यवर उपस्थित होते.