महाड (प्रतिनिधी ) राज्यभरातून शालेय सहलींचा हंगाम सुरू झाल्याने ऐतिहासिक आणि पर्यटनदृष्ट्या महत्त्वाच्या महाड शहरात विद्यार्थ्यांच्या सहलींची संख्या मोठ्या प्रमाणात वाढली आहे. मात्र या वाढत्या सहलींसोबत शहरातील वाहतूककोंडीचा प्रश्नही अधिक तीव्र होत असल्याचे सातत्याने निदर्शनास येत आहे. विशेषत: सहलींसाठी येणाऱ्या एसटी . व खाजगी आराम बसेस आणि खाजगी पर्यटन वाहनांमुळे शहरातील मुख्य मार्गावर सतत वाहतूक कोंडी झाल्याचे चित्र निर्माण होत आहे
महाड शहरातील चवदारतळे परिसरात वाहतूककोंडीचा सर्वाधिक फटका बसत असून, सायंकाळी व सकाळी महत्त्वाच्या वेळेत वाहने ये जा करीत असताना ही परिस्थिती अधिकच बिकट होत असल्याचे स्थानिक नागरिकांकडून वारंवार याबाबत प्रशासनाला सूचना दिल्या आहेत
भारताच्या सामाजिक चळवळीतील ऐतिहासिक टप्पा ठरलेल्या डॉ. बाबासाहेब आंबेडकरांच्या पाण्याच्या सत्याग्रहाचे स्थळ म्हणून चवदारतळ्याला मोठी ऐतिहासिक महत्ता आहे. एकता, समता आणि सामाजिक न्यायाचा संदेश देणाऱ्या या स्थळाला पाहण्यासाठी राज्यातील तसेच देश विदेशातून शाळा, महाविद्यालये व संघटनांच्या सहली मोठ्या प्रमाणात महाडमध्ये दाखल होत आहेत. याशिवाय किल्ले रायगड, शिवथरघळ, तसेच इतर ऐतिहासिक आणि प्राचीन स्थळांसाठीही महाड हा प्रवेशद्वार असल्याने वाहतुकीवरील ताण सातत्याने पडत आहे
शहरातील छत्रपती शिवाजी महाराज चौकातून चवदारतळ्याकडे जाणाऱ्या मार्गावर कोणतीही सुसूत्र पार्किंग व्यवस्था नाही. त्यामुळे खाजगी वाहनांची रस्त्याकडेला बेशिस्त पार्किंग मोठ्या प्रमाणात दिसून येते. परिणामी आंबेडकर चौक परिसरात सहलींच्या बसेस अडकल्याने वाहतूक पूर्णपणे ठप्प होते. या ठिकाणी कायमस्वरूपी वाहतूक पोलीस नियुक्त नसल्याने नागरिक, व्यापारी आणि वाहतूकदारांना मोठा त्रास सहन करावा लागत आहे.
महाड नगरपरिषदेच्या हद्दीत कोठेही अधिकृत, नियोजित पार्किंगची व्यवस्था नसल्याने शहरातील वाहतूक समस्या दिवसेंदिवस गंभीर होत आहे. सध्या दिवसाला २० ते२५ एसटी बसेस सहलींसाठी महाडमध्ये दाखल होत आहेत, मात्र हंगाम वाढला की हा आकडा दुप्पट होण्याचीही शक्यता आहे. त्यानुसार उपाययोजना न झाल्यास वाहतूक सुस्थितीत ठेवणे प्रशासनाला अशक्य होईल, अशी भीती नागरिक व्यक्त करत आहेत.
महा शहरातील सर्वच ठिकाणी होणाऱ्या वाहतूक कोंडीबाबत प्रशासनाकडून ठोस निर्णय न झाल्याने नाराजी वाढत आहे. नागरिक आणि वाहतूकदार संघटनांकडून,
“नगरपरिषद व पोलीस प्रशासनाने एकत्रितपणे समन्वय साधून योग्य धोरण अवलंबावे आणि वाहतुकीची समस्या तातडीने दूर करावी”
अशी मागणी आता जोर धरू लागली आहे.
शहरात असणाऱ्या शासकीय व खाजगी बँकां या ठिकाणी आहे त्या ठिकाणी पार्किंग व्यवस्था नसल्याने मोठ्या प्रमाणावर त्या ठिकाणी वाहतूक कोंडी होते यातून बँक व्यवस्थापनाने स्वतःचे खाजगी सुरक्षा व्यवस्था उपलब्ध करून वाहतूक कोंडीतून मार्ग काढणे गरजेचे आहे मात्र वाहतूक कोंडीबाबत नगरपालिका प्रशासन कारवाई करायचे नाव देत नसल्याने मोठ्या प्रमाणे वाहतूक कोंडी तर निर्माण होत आहे