मिरा-भाईंदर शहरात “जेष्ठ नागरिक केंद्राचे लोकार्पण संपन्न !
“जेष्ठांच्या चेहऱ्यावर पुन्हा हास्य फुलवणे, हीच खरी सामाजिक बांधिलकी” – मंत्री प्रताप सरनाईक
मिरा-भाईंदर : आयुष्यभर कुटुंब, समाज आणि पुढील पिढ्यांच्या घडणीत आपले आयुष्य अर्पण करणाऱ्या जेष्ठ नागरिकांना सन्मानाचे, आपुलकीचे आणि आनंदाचे व्यासपीठ मिरा-भाईंदर शहरात उभे राहिले आहे. हिंदुहृदयसम्राट स्व. बाळासाहेब ठाकरे कलादालन येथे महाराष्ट्र राज्य परिवहन मंत्री तथा धाराशिव जिल्हा पालकमंत्री प्रताप इंदिराबाई बाबुराव सरनाईक यांच्या शुभहस्ते “जेष्ठ नागरिक केंद्राचा लोकार्पण सोहळा” मोठ्या उत्साहात पार पडला.
मंत्री प्रताप सरनाईक यांच्या संकल्पनेतून आणि पुढाकारातून साकारलेले हे केंद्र म्हणजे केवळ विरंगुळ्याचे ठिकाण नसून, जेष्ठांच्या जीवनात नवचैतन्य फुंकणारा एक सामाजिक उपक्रम आहे. आधुनिक तंत्रज्ञानाचा वापर करून जेष्ठांसाठी तयार करण्यात आलेल्या या केंद्रात पारंपरिक खेळ, ऐतिहासिक माहिती, जुन्या गाण्यांचा संग्रह, आरोग्यविषयक सुविधा आणि छोट्या गटासाठी सांस्कृतिक कार्यक्रमांची सोय अशा अनेक उपक्रमांचा समावेश आहे.
जेष्ठ नागरिक केंद्रातील प्रमुख वैशिष्ट्ये :
• बुद्धिबळ, साप-शिडी, लुडो यांसारखे पारंपरिक खेळ आधुनिक पद्धतीने साकारलेले
• १९७० पासून ते आजपर्यंतच्या इतिहासाचे व्हिज्युअल प्रदर्शन
• जुनी गाणी आणि सुवर्णकाळातील आठवणींचा संगीतसंग्रह
• AI तंत्रज्ञानाद्वारे आरोग्यविषयक माहिती व व्यायाम मार्गदर्शन
• जेष्ठांसाठी छोट्या गटांमध्ये सांस्कृतिक व गेट-टुगेदर कार्यक्रमांची सुविधा
या केंद्राच्या माध्यमातून मिरा-भाईंदरमधील जेष्ठ नागरिकांना समाजात पुन्हा एकदा सक्रिय भूमिका बजावण्याची, संवाद साधण्याची आणि आपल्या छंदांना नवी दिशा देण्याची संधी मिळणार आहे.
या प्रसंगी मंत्री प्रताप सरनाईक म्हणाले कि, “मिरा-भाईंदर हे वेगाने विकसित होणारे शहर आहे. या शहराच्या प्रगतीसोबतच आपल्या जेष्ठांचा सन्मान, त्यांचं समाधान आणि आनंद कायम ठेवणं हेच आमचं कर्तव्य आहे. जेष्ठांच्या चेहऱ्यावर पुन्हा हास्य फुलवणं हीच आमच्यासाठी खरी सामाजिक बांधिलकी आहे. जेष्ठांच्या अनुभवानं आणि आशीर्वादानं समाज अधिक समृद्ध होत असतो, या जाणिवेतून साकारलेले हे “जेष्ठ नागरिक केंद्र” मिरा-भाईंदरच्या सामाजिक आणि सांस्कृतिक वाटचालीत एक महत्त्वपूर्ण टप्पा ठरणार आहे.”