मीरा रोड – मीरा-भाईंदर महानगरपालिका आयुक्त तथा प्रशासक राधाबिनोद अ. शर्मा (भा.प्र.से.) यांच्या संकल्पनेतून उभारण्यात आलेल्या सुसज्ज ‘RRR वाचनालयाचे’ उद्घाटन ४ नोव्हेंबर २०२५ रोजी महानगरपालिका मुख्य कार्यालयात आयुक्त यांच्या हस्ते पार पडले.
महानगरपालिकेतील अधिकारी आणि कर्मचाऱ्यांच्या ज्ञानवृद्धी व कौशल्यविकासासाठी हे वाचनालय उभारण्यात आले आहे. दैनंदिन कामकाजात उपयोगी ठरणाऱ्या विविध विषयांवरील मराठी, इंग्रजी आणि इतर भाषांमधील सुमारे १२०० पुस्तके येथे वाचनासाठी उपलब्ध करून देण्यात आली आहेत.
हे ‘RRR वाचनालय’ हे स्वच्छ भारत मिशन अंतर्गत स्थापन करण्यात आलेल्या RRR सेंटर (Reduce, Reuse, Recycle) या उपक्रमाचा एक महत्त्वपूर्ण भाग आहे. या उपक्रमाद्वारे पुनर्वापर आणि संसाधनांच्या संवर्धनाच्या संकल्पनेला चालना मिळणार आहे.
या प्रसंगी अतिरिक्त आयुक्त डॉ. संभाजी पानपट्टे, अतिरिक्त आयुक्त प्रियंका राजपूत, उपायुक्त (मुख्यालय) कल्पिता पिंपळे, उपायुक्त डॉ. सचिन बांगर, उपायुक्त कविता बोरकर, तसेच कार्यकारी अभियंते नितीन मुकणे, शरद नानेगावकर, माहिती व जनसंपर्क अधिकारी राज घरत, आणि चाईल्ड हेल्प फाउंडेशन, रत्ननिधी चॅरिटेबल ट्रस्ट, आशिर्वाद फाउंडेशनचे पदाधिकारी उपस्थित होते.