दादर, मुंबई – वंचित बहुजन आघाडीच्या वतीने एडवोकेट बाळासाहेब आंबेडकर यांच्या नेतृत्वात दादर येथील छत्रपती शिवाजी महाराज पार्कात आयोजित “संविधान सन्मान महासभा” या भव्य कार्यक्रमासाठी आज मीरा-भाईंदरमध्ये उत्साहाचे वातावरण पाहायला मिळाले.
मीरा-भाईंदर वंचित बहुजन आघाडीचे अध्यक्ष इकबाल महाडिक यांच्या नेतृत्वात शेकडो कार्यकर्ते व पदाधिकारी दादरकडे रवाना झाले. संविधान दिवसाच्या पार्श्वभूमीवर आयोजित या महासभेला मोठ्या प्रमाणात बहुजन समाज, महिला, युवक आणि विविध घटकांकडून उत्स्फूर्त प्रतिसाद मिळत आहे.
कार्यकर्त्यांनी प्रस्थानापूर्वी संविधानाची प्रत हातात घेत “भारत का संविधान – हमारा अभिमान” अशा घोषणा देत वातावरण भारावून टाकले. मीरा-भाईंदरमधील सर्व विभागांतून सकाळपासूनच कार्यकर्त्यांची गर्दी वाढू लागली होती.
अध्यक्ष इकबाल महाडिक यांनी सांगितले की,
“संविधानाच्या अस्तित्त्वावर चाललेल्या सर्व हल्ल्यांविरोधात आणि सामाजिक न्यायाच्या रक्षणासाठी ही महासभा ऐतिहासिक ठरणार आहे. मीरा-भाईंदर येथून मोठ्या संख्येने कार्यकर्ते उपस्थित राहून आपली ताकद दाखवणार आहेत.”
दादर येथे होणाऱ्या या कार्यक्रमात भारतरत्न डॉ. बाबासाहेब आंबेडकर यांच्या विचारांचा जागर आणि संविधानाचे मूल्य जपण्याचा निर्धार व्यक्त केला जाणार आहे.