मिरा-भाईंदर : मिरा-भाईंदर महानगरपालिका आयुक्त व प्रशासक राधाबिनोद अ. शर्मा (भा.प्र.से.) यांच्या निर्देशानुसार शहरातील मुख्य कार्यालय व सर्व प्रभाग कार्यालयांमध्ये विशेष मतदार सहाय्यता केंद्रे (HELP DESK) सुरू करण्यात आली आहेत. आगामी निवडणुकांच्या पार्श्वभूमीवर नागरिकांना आपले नाव कोणत्या वॉर्डमध्ये समाविष्ट झाले आहे, हे तपासणे आता अधिक सुलभ झाले आहे.
महापालिकेच्या या सहाय्यता केंद्रांमधून नागरिकांना आपले नाव मतदार यादीत योग्यरित्या समाविष्ट झाले आहे का, तसेच वॉर्ड क्रमांकाची अचूक माहिती मिळणार आहे.
महासेकच्या संकेतस्थळावर सोपी सुविधा
राज्य निवडणूक आयोगाच्या mahasecvoterlist.in या संकेतस्थळावर नागरिकांना Name Wise, EPIC Number Wise, मतदार यादीत आपली माहिती सहज तपासता येणार आहे. यासाठीची थेट लिंक महानगरपालिकेच्या अधिकृत संकेतस्थळावर mbmc.gov.in वर उपलब्ध करून देण्यात आली आहे.
हरकती व सूचनांसाठी अंतिम तारीख — ३ डिसेंबर २०२५
राज्य निवडणूक आयोगाने जाहीर केलेल्या वेळापत्रकानुसार प्रारूप मतदार यादीवरील हरकती आणि सूचना दाखल करण्याची अंतिम तारीख ०३ डिसेंबर २०२५ आहे.
ज्या नागरिकांची नावे चुकीच्या वॉर्डमध्ये गेलेली असतील त्यांनी निर्दिष्ट मुदतीत तक्रार व सूचना दाखल कराव्यात. हरकती व सूचना महानगरपालिकेच्या मुख्य कार्यालयात, कर विभाग, पहिला मजला येथे प्रत्यक्ष स्वीकारल्या जाणार आहेत.
महापालिकेचे नागरिकांना आवाहन
नागरिकांनी आपल्या जवळच्या मतदार सहाय्यता केंद्राला भेट देऊन नाव व वॉर्ड क्रमांक तपासावा. त्रुटी असल्यास त्वरित हरकती नोंदवाव्यात असे आवाहन महानगरपालिका प्रशासनाकडून करण्यात आले आहे.
मिरा-भाईंदरकरांसाठी ही सुविधा अत्यंत उपयुक्त ठरणार असून, निवडणूक प्रक्रिया अधिक पारदर्शक व सुलभ होण्यास मदत करणार आहे.