मुंबई (प्रमोद देठे ) : “अबोल पशु करे पोकार, हमे बचाओ हे! नार नार” हे भावनिक घोषवाक्य घेऊन आईजा संस्थेचे राष्ट्रीय संस्थापक अध्यक्ष हार्दिक हुंडिया यांनी प्राणी कल्याणाविषयी जनजागृती निर्माण करण्यासाठी एक विशेष गीत तयार केलं आहे. सुप्रसिद्ध पार्श्वगायक सुदेश भोसले यांच्या आवाजात आणि प्रसिद्ध गीतकार-संगीतकार रवी जैन यांच्या लेखणी व संगीत दिग्दर्शनात हे गीत गोरेगाव (मुंबई) येथील स्टुडिओमध्ये रेकॉर्ड करण्यात आले.
हार्दिक हुंडिया म्हणाले, “प्राणी कल्याण हे केवळ सेवा नव्हे, तर आपली जबाबदारी आहे. भारतीय राज्यघटनेनुसार मोकाट जनावरांनाही जगण्याचा अधिकार आहे आणि देशातील तरुण पिढी यात सक्रिय सहभाग घेत आहे.”
या गाण्याविषयी सांगताना सुदेश भोसले म्हणाले, “हे गाणं वेगळ्या विषयावर आहे. मी यामध्ये कोणतेही विनोदपर किंवा व्यंगात्मक स्वर वापरले नाहीत, कारण हा विषय अंतर्मनाला भिडणारा आहे.” तर रवी जैन यांनी आशा व्यक्त केली की, “या गाण्यात लवकरच इतरही प्रसिद्ध गायक सामील होतील.”
गाण्याचे चित्रिकरण देशभरातील प्राणी कल्याण केंद्रे, पिंजरे, आणि मुक्त संचार करणाऱ्या प्राण्यांच्या निवासस्थळी करण्यात येणार आहे. हार्दिक हुंडिया म्हणाले, “हे गाणं जगातील प्राणी कल्याण विषयावरील पहिले संगीतबद्ध अभियान ठरेल.”
रवी जैन यांनी लिहिलेल्या गीतातील ओळी प्राणीप्रेम आणि जबाबदारीचा संदेश देतात – “प्रत्येक प्राणीप्रेमीला वाटतं की कोणत्याही प्राण्याला त्रास होऊ नये, ही जबाबदारी आपलीच आहे.”
हे गाणे लवकरच सोशल मीडियावर आणि विविध संगीत प्लॅटफॉर्म्सवर प्रसारित होणार असून, जनमानसात जागरुकता निर्माण करणाऱ्या उपक्रमांमध्ये हे गीत महत्त्वाचे योगदान देईल, असा विश्वास हार्दिक हुंडीया यांनी व्यक्त केला.