मीरा-भाईंदर, दि. ५ ऑक्टोबर: मीरा-भाईंदर शहरातील जुन्या इमारतींच्या पुनर्विकास प्रक्रिया, ७९-ए परवानगी, डीसी कंवर्जन, ७/१२ उतारा आणि सोसायटी नोंदणी यांसारख्या विविध गुंतागुंतीच्या विषयांवर नागरिकांना मार्गदर्शन मिळावे यासाठी एक भव्य मार्गदर्शन शिबिराचे आयोजन करण्यात आले. महाराष्ट्र राज्य परिवहन मंत्री तसेच धाराशिव जिल्ह्याचे पालकमंत्री आणि स्थानिक आमदार मा. प्रताप (इंदिराबाई) सरनाईक यांच्या पुढाकारातून हे शिबिर रविवारी, ५ ऑक्टोबर रोजी पद्मभूषण डॉ. अप्पासाहेब धर्माधिकारी सभागृह, मेडतीया नगर, मिरारोड (पूर्व) येथे पार पडले.
या शिबिरात शेकडो सोसायट्यांचे पदाधिकारी, स्थानिक नागरिक व रहिवासी मोठ्या संख्येने सहभागी झाले होते. नागरिकांनी आपल्या समस्या थेट अधिकाऱ्यांसमोर मांडल्या, तर उपस्थित तज्ज्ञ अधिकारी व शासकीय कर्मचारी यांनी त्यावर तात्काळ मार्गदर्शन करून सल्ला दिला.
शिबिराला मार्गदर्शन करण्यासाठी ठाणे जिल्हाधिकारी डॉ. श्रीकृष्ण पांचाळ, मीरा-भाईंदर महानगरपालिका आयुक्त राधाबिनोद शर्मा, जिल्हा उपनिबंधक डॉ. किशोर मांडे, मीरा-भाईंदर अप्पर तहसीलदार निलेश गौंड, उपनिबंधक सहकारी संस्था (ठाणे तालुका) किशन रतनाळे, नगर रचनाकार पुरुषोत्तम शिंदे आणि इतर संबंधित अधिकाऱ्यांची उपस्थिती होती.
या प्रसंगी मंत्री प्रताप सरनाईक म्हणाले,”शहरातील प्रत्येक नागरिकाला स्वतःचे हक्काचे घर मिळावे, हे माझे कर्तव्य आहे. शासन व प्रशासनाचे दरवाजे नागरिकांसाठी कायमस्वरूपी खुले आहेत. शिबिरातून प्राप्त झालेल्या सूचनांच्या आधारे पुढील निर्णय घेण्यात येतील. योग्य कागदपत्रांचा पाठपुरावा करून लवकरात लवकर नागरिकांना दिलासा देण्यात येईल.”
शिबिरादरम्यान नागरिकांनी मोठ्या उत्साहाने सहभाग घेतला आणि आपल्या अनेक वर्षांपासून प्रलंबित समस्या मांडल्या. यामुळे या उपक्रमाला उत्स्फूर्त प्रतिसाद लाभला. मंत्री सरनाईक यांनी यापुढे देखील अशाच प्रकारची नियमित मार्गदर्शन शिबिरे घेण्याचे आश्वासन दिले.