महाड -( प्रतिनिधी) महाड तालुक्यातील ग्रामीण भागामध्ये शिक्षण व सामाजिक क्षेत्रात प्रभावी कार्य करणाऱ्या घुरुपकोंड येथील प्राथमिक शाळेच्या मुख्याध्यापिका तसेच सृष्टी प्रतिष्ठानच्या संस्थापिका सौ. स्मिता नवघरे-जोष्टे यांना स्वतंत्र कोकण राज्य अभियानातर्फे ‘कोकण रत्न २०२५’ जाहीर करण्यात आला आहे. मुंबई मराठी पत्रकार भवन येथे १३ डिसेंबर रोजी त्यांचा सन्मान होणार आहे.
सौ. स्मिता जोष्टे या मूळच्या खान्देश प्रदेशातील असून, खान्देश एकता मंडळ, महाडच्या सक्रिय सदस्य आहेत. त्या सामाजिक आणि सांस्कृतिक क्षेत्रात सातत्याने सहभाग घेत असून, खान्देश आणि कोकण यांच्या स्नेहबंधांना जोडणारे कार्य त्यांनी केले आहे. तसेच त्या आंतरराष्ट्रीय पुरस्कारप्राप्त प्राथमिक शिक्षिका असून विद्यार्थ्यांसाठी विविध शैक्षणिक उपक्रमांची अंमलबजावणी, किशोरवयीन मुलींना मार्गदर्शन व सॅनिटरी पॅड वाटप तसेच शिक्षणक्षेत्रातील नावीन्यपूर्ण योगदान याबाबत त्यांचे विशेष कार्य अधोरेखित होते.
महिला सक्षमीकरणाच्या उद्देशाने त्यांनी ग्रामीण महिलांना व्यासपीठ उपलब्ध करून दिले असून ऐतिहासिक स्थळांना भेटी, विविध सांस्कृतिक स्पर्धा, हळदीकुंकू समारंभ, वृद्धाश्रमांना साहित्य वाटप, वृक्षलागवड असे अनेक सामाजिक उपक्रम सृष्टी प्रतिष्ठानच्या माध्यमातून राबवले आहेत.
यापूर्वी विविध सामाजिक संस्थांकडूनही त्यांचा सत्कार झाला त्यांना मिळालेला ‘कोकण रत्न’ हा त्यांच्या कार्यातील अकरावा सन्मान आहे. कोकण रत्न सन्मान जाहीर झाल्यानंतर महाडमधील त्यांचे माजी विद्यार्थी, मित्रपरिवार, खान्देश एकता मंडळ तसेच घुरुपकोंड शाळेतील व्यवस्थापन समिती, ग्रामस्थ, सरपंच, उपसरपंच यांनीही त्यांच्या कार्याचा गौरव करत पुढील वाटचालीस शुभेच्छा दिल्या आहेत.