महाड – कोकणात सहकाराच्या माध्यमातून फलोत्पादन, मासेमारीवर प्रक्रिया करणारे चार ते पाच प्रकल्प येणाऱ्या काळात आणणार आहोत. सरकार व मंत्र्यांना बरोबर घेऊन कोकणची अर्थव्यवस्था मजबूत, बळकट कशी होईल व या मातीतील माणूस या मातीतच कसा राहील याची काळजी घेण्याचे काम भविष्यात करू, असे प्रतिपादन भाजपा गटनेते, मुंबई जिल्हा बँकेचे आणि महाराष्ट्र राज्य सहकारी संघाचे अध्यक्ष आमदार प्रविण दरेकर यांनी महाड येथे केळे.
महाड येथे मध्य कोकण क्षत्रिय मराठा को -ऑप. क्रेडिट सोसायटीच्या महाड शाखेचा उदघाटन सोहळा पार पडला. या सोहळ्याला रोजगार हमी व फलोत्पादन मंत्री भरत गोगावले, ऍड. वीरेंद्र पवार, वसई विरारचे मा. नगरसेवक प्रदीप पवार, मुंबई हौसिंग फेडरेशनचे अध्यक्ष प्रकाशदरेकर, मुंबई बँकेचे संचालक नितीन बनकर, विठ्ठलराव भोसले, जिजाबा पवार, श्वेता परुळेकर, भाजपा रायगड चिटणीस बिपीन म्हामुणकर, क्षत्रिय मराठा पतसंस्थेचे अध्यक्ष राजेश येरुणकर, प्रशांत यादव, बाळ राऊळ, महेश शिंदे, प्रसन्न पलांडे यांसह मोठ्या संख्येने नागरिक उपस्थित होते.
यावेळी बोलताना दरेकर म्हणाले कि, क्षत्रिय मराठा पतसंस्थेची ही पाचवी शाखा आहे. स्वातंत्र्यापूर्वी स्थापन झालेली संस्था होती. ही पतसंस्था आपल्या मराठा समाजाच्या बांधवांनी एकत्र येऊन निर्माण केली. सर्व अडचणीवर मात करत येथे शाखा सुरु करत आहोत. या शाखेच्या उदघाटनाला मंत्री भरत गोगावले यांना बोलावले आहे. आपल्या मातीतील माणसाला बोलाविण्यासाठी मोठे मन लागते. गोगावले रोजगार हमी, फलोत्पादन मंत्री आहेत. रोजगार द्यायचा असेल तर रोजगार मंत्री आपल्याकडे पाहिजेत. आपल्याला पाठबळाची हमी पाहिजे, भरत गोगावले पाहिजेत व योजना बनवायची असेल तर मी ती बनवून देतो पण येथे चांगले प्रकल्प उभे राहतील याची काळजी घेऊ.
दरेकर पुढे म्हणाले कि, आपण फलोत्पादन प्रक्रिया करणारे प्रकल्प आणले पाहिजेत. १०-१५ वर्षांपूर्वी आंबेडकर भवन येथे माझा सत्कार झाला त्यावेळी मी आवाहन केले होते कि उद्योगासाठी तरुणांनी पुढे यावे, जी लागेल ती मदत मुंबई बँकेच्या माध्यमातून केली जाईल. पण महाड-पोलादपूर मधून एकही तरुण उद्योगासाठी पुढे आला नाही. आपली मानसिकता अशी असेल तर आपल्याला उद्योग व्यवसाय उभे करता येणार नाही आणि नोकरी देणाऱ्याऐवजी चाकरीच आयुष्यभर करावी लागेल. हे चित्र आपल्याला बदलावे लागेल, असे आवाहनही दरेकरांनी यावेळी केले.
ते पुढे म्हणाले, मुंबई बँकेमार्फत आम्ही सामाजिक बांधिलकी जपली. राज्यातील वेगवेगळ्या प्रकल्पाना पैसे दिले. कोकणात फलोत्पादनचा एकही प्रकल्प झाला नाही. पण अमरावतीच्या अचलपूरला बच्चू कडू यांनी संत्र्यावर प्रक्रिया करणारा उद्योग सुरु केला. मात्र तुमच्यातील एकही तरुण पुढे येत नाही. जोपर्यंत तुमच्यात मानसिकता येत नाही तोपर्यंत विकास होऊ शकत नाही. एखाद्या गावात रस्ता झाला पण तेथील घरांत चूल पेटत नसेल तर त्या विकासाला काही अर्थ उरत नाही. ती चूल पेटविण्याचे काम क्षत्रिय मराठा पतसंस्था येणाऱ्या उद्योगाच्या माध्यमातून करणार असल्याचेही दरेकरांनी आश्वस्त केले.
दरेकर म्हणाले कि, सहकारात कुठलेही राजकारण नसते. सहकाराला जातच नसते. सहकारात सर्व जाती धर्माचे लोकं एकत्र येऊन काम करतात. क्षत्रिय मराठा पतसंस्था महाड पोलादपूरच्या प्रत्येक गरजूला मदत करेल असा विश्वासही दरेकरांनी व्यक्त केला.
दरेकर म्हणाले कि, मुंबई बँकेच्या माध्यमातून अनेक योजना आणल्या. गृहनिर्माण क्षेत्रासाठी स्वयं पुनर्विकास योजना आणली. या योजनेसाठी मुख्यमंत्री यांच्याकडे १८ मागण्या केल्या होत्या त्यापैकी १६ मागण्या तात्काळ मान्य करण्यात आल्या. १६०० प्रस्ताव बँकेकडे आले त्यातील २० इमारती उभ्या राहिल्या असून लोकं चाव्या घेऊन राहायला गेले आहेत. ज्यावेळी आपल्याकडे पद, सत्ता आणि संस्थात्मक ताकद असते त्यावेळी तिचा उपयोग सर्वसामान्य लोकांना झाला पाहिजे असेही दरेकर म्हणाले. तसेच लाडक्या बहिणींसाठी शून्य पैसे देऊन लाखो खाती बँकेत उघडली. आम्ही तेवढ्यावरच थांबलो नाही तर या महिलांना व्यवसायात आणले पाहिजे यासाठी बिनव्याजी कर्ज योजना आणली. दोनशे महिलांना बिनव्याजी कर्जाचे एक लाखाचे धनादेश उद्योग व्यवसायासाठी दिल्याचेही दरेकर म्हणाले.
चिपळूणमध्ये राज्य सहकारी संघाचे विभागीय सहकार प्रशिक्षण केंद्र उभारणार
दरेकर म्हणाले कि, सहकारात स्पर्धा होण्याची आवश्यकता असून जास्तीत जास्त लोकांनी सहकारात यावे. भव्य मेळावा नाही तर कोकणची सहकार परिषद आपण घेणार आहोत. प्रत्येक विभागाची विभागीय प्रशिक्षण केंद्र आहेत. परंतु रायगड, रत्नागिरी, सिंधुदुर्ग येथे प्रशिक्षण केंद्र नाही. येणाऱ्या काळात चिपळूणमध्ये महाराष्ट्र राज्य सहकारी संघाचे विभागीय सहकार प्रशिक्षण केंद्र सुरु करणार आहोत, अशी घोषणा आमदार प्रविण दरेकर यांनी केली. तसेच या प्रशिक्षण केंद्राच्या माध्यमातून कोकणातील नव्या पिढीला सहकाराचे मार्गदर्शन होईल, असा विश्वासही त्यांनी व्यक्त केला.