प्रमोद देठे – महाराष्ट्र दुकाने व आस्थापना (नोकरीचे व सेवाशर्तीचे विनियमन) अधिनियम, २०१७ अंतर्गत राज्यातील मद्यविक्रीवगळता सर्व प्रकारच्या आस्थापनांना २४ तास सुरू ठेवण्यास कायदेशीर परवानगी आहे, असे स्पष्ट करत महाराष्ट्र शासनाने ताजे परिपत्रक जारी केले आहे. या अधिनियमानुसार, राज्यातील सर्व दुकाने, निवासी हॉटेल्स, उपाहारगृहे, खाद्यगृहे, थिएटर्स, करमणुकीच्या इतर जागा व इतर आस्थापनांमध्ये काम करणाऱ्या कर्मचाऱ्यांच्या सेवा व नोकरीच्या अटींचे विनियमन करण्यात आले आहे.
शासनाने स्पष्ट केले आहे की, कलम १६(१)(ख) नुसार आस्थापना आठवड्याचे सर्व दिवस सुरू ठेवता येतात, परंतु प्रत्येक कर्मचाऱ्याला आठवड्यातून सलग २४ तासांची विश्रांती देणे बंधनकारक आहे.
कलम २(२) मध्ये “दिवस” ही व्याख्या मध्यरात्रीपासून सुरू होणारा चोवीस तासांचा कालावधी अशी दिली आहे.
त्यानुसार, परमिट रूम, बिअर बार, हुक्का पार्लर, डान्स बार, डिस्कोथेक, वाईन शॉप्स आणि मद्य विक्री करणाऱ्या इतर आस्थापनांव्यतिरिक्त सर्व आस्थापना २४ तास सुरू ठेवण्यास कायदेशीर परवानगी आहे.
मद्यविक्री करणाऱ्या आस्थापनांच्या सुरू व बंद होण्याच्या वेळा मात्र शासनाच्या दि. १९ डिसेंबर २०१७ च्या अधिसूचनेनुसार निश्चित आहेत. यावर पुढील सुधारणा दि. ३१ जानेवारी २०२० रोजी करण्यात आली होती.
शासनाच्या निदर्शनास आले आहे की, काही पोलीस विभाग व स्थानिक प्रशासन अशा गैरमद्यविक्री आस्थापनांनाही २४ तास सुरू ठेवण्यास मज्जाव करत आहेत. त्यामुळे या परिपत्रकाद्वारे शासनाने संबंधित विभागांना कायद्यानुसार अंमलबजावणी करण्याचे निर्देश दिले आहेत.
सदर परिपत्रक महाराष्ट्र शासनाच्या www.maharashtra.gov.in या संकेतस्थळावर संकेतांक 202510011205158410 अंतर्गत उपलब्ध आहे.