विक्रमगड (पालघर) | प्रतिनिधी : भारतीय जनता पार्टीच्या सहकार आघाडीच्या वतीने, महाराष्ट्र विधान परिषदेचे सदस्य आ. प्रविण दरेकर यांच्या वाढदिवसानिमित्त पालघर जिल्ह्यातील विक्रमगड तालुक्यातील तेटवली गावातील आदिवासी कुटुंबांना दिवाळी फराळ साहित्य किट वाटप करण्यात येणार आहे. हा उपक्रम भाजप सहकार आघाडी, मुंबई यांच्या वतीने सामाजिक बांधिलकी जपत राबवण्यात येणार आहे.
दिनांक १० ऑक्टोबर २०२५, शुक्रवार रोजी या उपक्रमाचे आयोजन करण्यात आले असून, सकाळी ६:३० वाजता मुंबईहून पालघरकडे प्रयाण, तर १०:३० वाजता तेटवली गावात आगमन होईल. आगमनानंतर आदिवासी पारंपरिक तारपा नृत्याने स्वागत करण्यात येणार असून, भारत माता, छत्रपती शिवाजी महाराज आणि बिरसामुंडा यांच्या तसबिरींना पुष्पहार अर्पण करून कार्यक्रमाची सुरुवात होईल.
भाजप सहकार आघाडी, मुंबईचे अध्यक्ष सुनील बांबूळकर यांनी सांगितले की, “ही केवळ मदत नव्हे, तर आदिवासी बांधवांशी जिव्हाळ्याचं नातं जपणारा सामाजिक उपक्रम आहे. प्रविण दरेकर यांच्या वाढदिवसाचे औचित्य साधून दिवाळीचा आनंद या बांधवांपर्यंत पोहोचवण्याचा आमचा प्रयत्न आहे.”
कार्यक्रमात आदिवासी ग्रामस्थांचे मनोगत, गावाची माहिती, आदिवासी गीतांचे सादरीकरण, तसेच प्रविण दरेकर यांच्या वाढदिवसाचा केक कापून साजरा केला जाईल. त्यानंतर चकली, लाडू, चिवडा, कडबोळी आदी पारंपरिक पदार्थांचा समावेश असलेल्या दिवाळी फराळ किटचे वाटप केले जाईल.
यानंतर ग्रामस्थांसोबत स्नेहभोजन आणि शिवार फेरी, त्यानंतर गावकऱ्यांशी संवाद साधत कार्यक्रमाची सांगता करण्यात येईल.
या उपक्रमात भाजप सहकार आघाडीचे पदाधिकारी, स्थानिक कार्यकर्ते आणि सामाजिक कार्यकर्त्यांची उपस्थिती राहणार असून, सर्वांनी मोठ्या संख्येने सहभागी व्हावे, असे आवाहन आयोजकांनी केले आहे.