प्रमोद देठे – मिरा-भाईंदर महानगरपालिका हद्दीतील जरीमरी तलाव परिसरात गणेश विसर्जनानंतर उरलेल्या गणपतीच्या मूर्ती कचऱ्याच्या गाडीत टाकून नेत असल्याचे धक्कादायक प्रकार उघडकीस आला आहे. या कृत्यामुळे गणेश भक्तांच्या धार्मिक भावना दुखावल्याचे सांगण्यात येत असून, गणेशमूर्तीची विटंबना झाल्याचे आरोप होत आहेत.
संबंधित प्रकाराचे फोटो व्हायरल झाल्यानंतर, महाराष्ट्र नवनिर्माण सेनेने या प्रकाराचा तीव्र निषेध करत काशीगाव पोलीस ठाण्याचे वरिष्ठ पोलीस निरीक्षक तोगडवार यांना निवेदन दिले आहे. या निवेदनात, धार्मिक भावना दुखावल्याबद्दल BNS कलम २९९ नुसार गुन्हा दाखल करण्याची मागणी करण्यात आली आहे.
यावेळी महाराष्ट्र नवनिर्माण सेनेचे ठाणे उपजिल्हाध्यक्ष हेमंत सावंत, विधानसभा अध्यक्ष सचिन वसंत पोपळे, शहर उपाध्यक्ष रमाकांत माळी, शहर सचिव प्रकाश शेलार, मनसे विद्यार्थी सेना शहराध्यक्ष रॉबर्ट डिसोजा, तसेच भारत करचे, सतीश मोरे, संकेत म्हात्रे, करण हरिजन, अक्की पटेल, रोहित सुतार आदी महाराष्ट्र सैनिक उपस्थित होते.
मनसेच्या शिष्टमंडळाने प्रशासनाला इशारा दिला की, धार्मिक भावना दुखावणाऱ्या घटनांवर त्वरित कारवाई न झाल्यास तीव्र आंदोलन छेडले जाईल. तसेच भविष्यात असा प्रकार होऊ नये म्हणून महापालिकेने स्पष्ट मार्गदर्शक तत्त्वे आणि योग्य व्यवस्थापन करावे, अशी मागणीही करण्यात आली आहे.