महाड – (प्रतिनिधी) महाड दापोली रस्त्यावर रेवतळे आंग्रे कोंड जवळ जाळीच्या देवाच्या ठिकाणी दापोली पुणे शिवशाही बस निसरड्या रस्त्यावरून घसरून झालेल्या अपघातात ७ प्रवासी जखमी झाले असून उर्वरित २९ प्रवासी बस रस्त्याच्या बाजूला झाडावर आढळल्याने दैव बलवत्तर म्हणून प्रवासी वाचले
याबाबत अधिक माहिती अशी की दापोली आगारातून सकाळी ८.३० च्या सुमारास दापोली पुणे एमएच.०६. बी.डब्ल्यू.०५४५ ही शिवशाही बस रेवतळे आंग्रे कोंड या ठिकाणी आली असता समोरून येणाऱ्या खाजगी कारला वाचवण्याच्या प्रयत्नात बस चालकाने ब्रेक मारला असता गाडी रस्त्यावरील झाडाला जाऊन आदळली व पूर्ण बस रस्त्याच्या बाजूला असणाऱ्या गटारामध्ये जाऊन अडकली या बसमधून ३१ प्रवासी प्रवास करीत होते मात्र यातील दोन प्रवाशांना गंभीर स्वरूपाची दुखापत झाल्याने त्यांना महाड ग्रामीण रुग्णालयात हलविण्यात आले आहे इतर प्रवाशांना मात्र किरकोळ स्वरूपाच्या दुखापती झाल्या असून महाड आगारातील आगार व्यवस्थापक फुलपगारे यांनी दुसऱ्या एसटी बस मधून महाड येथे स्थलांतरित केले आहे
जखमींमध्ये रियाज हरसिलकर वय ३२ रा. बोरोंडी, समीक्षा सारंगे वय ३२ रा. पुणे, निलोफर हरसिलकर २६ बोरोंडी, मनिषा मनोहर महाडिक रा. हर्णे, नूरजहाँ रियाज हर्सिलकर ५२ दापोली, शैरीश माटवनकर वय २२, काजळपुरा महाड. शमशा माटवनकर ४४ महाड यांचा समावेश आहे. जखमींवर महाड ट्रॉमा केअर सेंटरमध्ये उपचार सुरू आहेत. गेली काही दिवस या सुस्थितीतील मात्र तीव्र उतार असलेल्या रस्त्यांवर सातत्याने अपघात होत असल्याने हा मार्ग चर्चेत आला आहे. या मार्गावर उपाययोजना करण्यासाठी काही ठिकाणी निसरडा रस्ता ठरवण्यात खरडवण्यात आला. मात्र यामुळे रस्त्याचे नुकसान होणार आहे. वाहन चालकांनी देखील रस्त्याच्या परिस्थितीकडे लक्ष देऊन वाहन चालवले पाहिजे अशा प्रकारचा सल्ला अधिकाऱ्यांकडून दिला जात आहे.
एसएमसी कन्स्ट्रक्शन कंपनीवर गुन्हा दाखल करणार का?
महाड दापोली रस्त्याची देखभाल दुरुस्तीचे काम हे महाड मधील एसएमसी कन्स्ट्रक्शन कंपनीकडे आहे या कंपनीने एप्रिल महिन्यामध्ये याच रस्त्यावर केवळ डांबर मारून त्यावर ग्रिट टाकल्याने या रस्त्यावर वारंवार अपघात घडत असून आजचा अपघात१६. वा अपघात असताना देखील सार्वजनिक बांधकाम उपविभाग महाड चे उपविभागीय अभियंता तुकाराम सनाळकर हे संबंधित कंपनीवर गुन्हा दाखल का करीत नाहीत असा सवाल या निमित्ताने स्थानिक ग्रामस्थांकडून विचारला जात आहे