मीरा-भाईंदर : मीरा-भाईंदर शहरातील नागरिकांना दररोज भेडसावणाऱ्या वाहतूककोंडीच्या समस्येवर आता तोडगा निघणार आहे.
राज्याचे परिवहन मंत्री व धाराशिव जिल्ह्याचे पालकमंत्री प्रताप सरनाईक यांनी दहिसर टोल नाक्याची पाहणी करून संबंधित अधिकाऱ्यांना तातडीच्या सूचना दिल्या.
या पाहणीदरम्यान त्यांनी अवैध पार्किंग, बेकायदेशीर टपऱ्या, होर्डिंग्ज आणि विविध अतिक्रमण यांची प्रत्यक्ष पाहणी केली.
मागील पाहणीनंतरही समाधानकारक कारवाई न झाल्याने मंत्री सरनाईक यांनी सात दिवसांत सर्व अतिक्रमण हटविण्याचे आदेश दिले.
“निर्धारित मुदतीत कारवाई न झाल्यास कठोर पावले उचलली जातील,” असा इशारा त्यांनी अधिकाऱ्यांना दिला.
दहिसर टोल नाक्यालगत असलेल्या इलेक्ट्रिसिटी डेपो, अनधिकृत टपऱ्या, मोठ्या होर्डिंग्ज आणि बॅनर्स यांच्यावर कारवाईचे आदेश देण्यात आले आहेत.
तसेच परिसरातील दोन झाडे हलविण्याच्या सूचना देखील देण्यात आल्या आहेत.
टोलनाका पुढे स्थलांतरित झाल्यानंतर पांडुरंगवाडी परिसरात वाहतूक कोंडी निर्माण होऊ नये म्हणून मिरा-भाईंदर आणि वसई-विरार पोलिस अधिकाऱ्यांना वाहतूक नियंत्रणाचे स्पष्ट निर्देश देण्यात आले.
यावेळी बोलताना मंत्री प्रताप सरनाईक म्हणाले,“मी या शहराचा लोकप्रतिनिधी म्हणून जनतेला समाधान देण्याचे काम करतो.
नागरिकांच्या सोयीसाठी व सुरक्षिततेसाठी कोणतीही तडजोड केली जाणार नाही.
दहिसर टोलनाक्यामुळे होणाऱ्या वाहतूक कोंडीचा प्रश्न कायमचा निकाली काढण्यासाठी हा चेक नाका पुढे स्थलांतरित करण्याचा निर्णय घेतला आहे.काहीही झाले तरी ८ नोव्हेंबरपर्यंत दहिसर टोल नाका स्थलांतरित होणार आहे.”
सरनाईक यांनी पुढे सांगितले की, “सरकारने दिलेलं वचन पूर्ण करण्यास आम्ही कटिबद्ध आहोत.
नागरिकांच्या अडचणी कमी करून वाहतुकीचा प्रवाह सुरळीत करणे हीच आमची प्राथमिक जबाबदारी आहे. त्यासाठी आवश्यक ती सर्व पावले उचलली जातील.”
दहिसर टोल नाका स्थलांतरित झाल्यास मीरा-भाईंदर शहरात प्रवेश करताना होणारी वाहतूक कोंडी मोठ्या प्रमाणावर कमी होण्याची शक्यता व्यक्त केली जात आहे.
दिवाळीपूर्वीच हा निर्णय अमलात आल्यास नागरिकांना मोठा दिलासा मिळणार आहे.