मिरा-भाईंदर – मिरा-भाईंदर शहराच्या वेशीवर गेली अनेक वर्षे वाहतूक कोंडीचं प्रमुख कारण ठरलेला दहिसर टोलनाका अखेर तात्पुरत्या स्वरूपात स्थलांतरित करण्यात आला आहे. महाराष्ट्र राज्य परिवहन मंत्री तथा धाराशिव जिल्हा पालकमंत्री आणि स्थानिक आमदार प्रताप इंदिराबाई बाबुराव सरनाईक यांच्या सातत्यपूर्ण पाठपुरावा, ठाम भूमिकेमुळे आणि निश्चयी प्रयत्नांमुळे आज हा ऐतिहासिक निर्णय प्रत्यक्षात उतरला आहे. नागरिकांना दिलासा देण्यासाठी आणि वाहतूक सुलभतेसाठी दोन अतिरिक्त लेन वाढविण्याचा निर्णय घेण्यात आल्याचे मंत्री सरनाईक यांनी यावेळी स्पष्ट केले. त्यामुळे आता शहरातील नागरिकांना दीर्घकाळ भेडसावत असलेली ट्रॅफिकची समस्या मोठ्या प्रमाणावर सुटलेली आहे.
दहिसर टोलनाक्यावरील ठेकेदाराचा मनमानी कारभार, अवैध पार्किंग, प्रचंड होर्डिंग्ज आणि अनियंत्रित व्यवस्थापनामुळे नागरिकांना दररोज वाहतूककोंडीचा त्रास सहन करावा लागत होता. या सर्व स्थितीचा आढावा घेत मंत्री सरनाईक यांनी स्वतः स्थळपाहणी केली होती आणि तत्काळ उपाययोजना करण्याचे आदेश दिले होते. त्यानंतर झालेल्या अथक पाठपुराव्यामुळे अखेर दहिसर टोलनाका तात्पुरत्या स्वरूपात स्थलांतरित करण्यात आला आहे. या विषयी बोलताना मंत्री प्रताप सरनाईक म्हणतात कि, “मी जेव्हा वचन देतो, ते पूर्ण करतो. १३ नोव्हेंबरला टोलनाका स्थलांतरित होणार हे मी सांगितलं होतं, आणि आज मी ते सिद्ध केलं आहे. आम्ही बोलण्यात नाही, कृतीत विश्वास ठेवतो. नागरिकांच्या हितासाठी झटणं हीच आमची आणि शिवसेनेची परंपरा आहे. शिवसेना जे बोलते, ते करून दाखवते… आणि आम्ही ते करून दाखवलं!”
तसेच त्यांनी स्पष्ट केले की टोलनाक्याचा अर्धा भाग स्थलांतरित झाला असून, उर्वरित भाग देखील लवकरच पुढे हलवला जाईल. मुंबई महानगरपालिका आयुक्त भूषण गगराणी, एमएसआरडीसी आणि एनएचएआय अधिकाऱ्यांनी घेतलेल्या निर्णयानुसार मुंबईकडे जाणाऱ्या मार्गावर आणखी दोन मार्गिका (लेन) वाढविण्यात येणार आहेत, ज्यामुळे नागरिकांना वाहतूक कोंडीपासून संपूर्ण दिलासा मिळेल.
मंत्री सरनाईक यांचे विरोधकांच्या टिकांना ठाम उत्तर
“मी बोलण्यावर नाही करून दाखवण्यावर विश्वास ठेवतो आणि मी जो शब्द दिला होता तो पूर्ण केला आहे. हत्ती गेलं शेपूट राहिलं आहे… पण आम्ही काम पूर्ण होईपर्यंत थांबणार नाही. नागरिकांचा त्रास संपेपर्यंत लढा सुरू राहील. दहिसर टोलनाका स्थलांतरित झाल्याने मिरा-भाईंदर शहराच्या वाहतुकीला नवा श्वास मिळाला आहे. नागरिकांच्या अपेक्षांना न्याय देणारा हा निर्णय शिवसेनेच्या कार्यशैलीचा आणि निर्धाराचा ठळक पुरावा आहे.”