मुंबई महापालिकेवर भगवा फडकविण्यात सहकार आघाडीचा सिंहाचा वाटा असणार; भाजपा मुंबई अध्यक्ष अमित साटम यांचा विश्वास

मुंबई महापालिकेवर भगवा फडकविण्यात सहकार आघाडीचा सिंहाचा वाटा असणार; भाजपा मुंबई अध्यक्ष अमित साटम यांचा विश्वास

मुंबईची अर्थव्यवस्थाही सहकाराच्या ताब्यात असावी, भाजपा गटनेते आमदार प्रविण दरेकर यांचे प्रतिपादन

मुंबई – आगामी काळात सहकार आघाडीच्या मार्फत आणि प्रविण दरेकर यांच्या नेतृत्वाखाली असे काम उभे करू कि मुंबई महापालिकेवर जेव्हा महायुतीचा भगवा फडकेल तो भगवा फडकण्यामागे सहकार आघाडीचा सिंहाचा वाटा असेल, असा विश्वास भाजपा मुंबई अध्यक्ष आमदार अमित साटम यांनी भाजपा सहकार आघाडी मुंबईतर्फे भाजप मुंबईच्या दादर येथील कार्यालयात आयोजित ‘मुंबईतील सहकार’ या विषयावर बोलताना व्यक्त केला. तसेच भाजपा गटनेते आमदार प्रविण दरेकर यांनी मुंबईची अर्थव्यवस्था ही सहकाराच्या ताब्यात असावी, असे प्रतिपादन केले.

या कार्यक्रमाला मुंबई हौसिंग फेडरेशनचे अध्यक्ष प्रकाश दरेकर, कंझ्युमर फेडरेशनचे अध्यक्ष विठ्ठलराव भोसले, सहकार आघाडीचे अध्यक्ष सुनील बांबूळकर, मुंबई सहकार आघाडीचे अध्यक्ष अनिल गजरे, सुभाष मराठे, जिजाबा पवार यांसह सहकार आघाडीचे कार्यकर्ते व पदाधिकारी उपस्थित होते.

यावेळी बोलताना मुंबई भाजपा अध्यक्ष आमदार अमित साटम म्हणाले कि, सहकारामुळे आपल्या सर्वांची मुंबईकरांशी नाळ जोडलेली आहे. मुंबईकरांसाठी जशी महापालिका आहे तशी मुंबई भाजपासाठी सहकार आघाडी आहे. येथे बसलेले कार्यकर्ते, पदाधिकारी मुंबई महापालिका निवडणुकीत विजयाकरिता सिंहाचा वाटा घेऊ शकतात. प्रविण दरेकर यांनी मुख्यमंत्री देवेंद्र फडणवीस यांच्या मागे लागून स्वयंपुनर्विकासाचे अनेक प्रश्न सोडवून घेतले. स्वयंपुनर्विकासाच्या माध्यमातून आपण मुंबई शहरात क्रांती घडवली आहे. मुंबईत १९६०,७०,८० च्या दशकात इमारती उभारल्या त्यावेळी विकासक नव्हते. त्यावेळी स्वयंपुनर्विकासच होता. १९९० च्या दशकात मुंबईत मोठ्या प्रमाणावर विकासक जन्माला आले. मुख्यमंत्री देवेंद्र फडणवीस यांनी बीडीडी चाळीत राहणाऱ्या मराठी माणसाला १८० चौ. फुटातून ५०० चौ. फुटाचे घर दिले. अभ्यूदय नगरच्या लोकांना ६३० चौ.फुटाचे घर देण्याचे काम करताहेत. तर दुसऱ्या बाजूला प्रविण दरेकर मुंबई शहरात राहणाऱ्या मराठी माणसाला स्वयंपुनर्विकासाच्या मार्फत स्वतःचे मोठे घर त्याच ठिकाणी उपलब्ध करून देण्याचे काम करत आहेत. ही खरी मराठी माणसाची सेवा आहे. त्यामुळे फक्त मराठी माणसाकरिता गप्पा करणे किंवा मराठी माणसाच्या बाता मारणे इथपर्यंत आमचे मराठी माणसाबाबतचे प्रेम सीमित नाही. कोविडच्या काळात सर्वांनी पाहिले ज्यांनी कार्य करायला पाहिजे होते ते फेसबुक लाईव्ह करत बसले आणि या महाराष्ट्रातील जनतेचे अश्रू पुसण्याचे काम त्यावेळचे विरोधी पक्ष नेते देवेंद्र फडणवीस यांनी केले, असे सांगत अमित साटम यांनी उद्धव ठाकरे यांना टोला लगावला.

साटम पुढे म्हणाले कि, गेल्या ११ आणि ५ वर्षात मराठी माणसासाठी काम हे मुंबई शहरात भाजपच्या माध्यमातून झालेय. स्वयंपुनर्विकासाच्या माध्यमातून एवढी ताकद मुंबईत उभी केली आहातच परंतु भाजपाची ताकद वाढविण्यामागे दरेकर यांचा सहकार क्षेत्राच्या माध्यमातून सिंहाचा वाटा आहे. भाजपाची ताकद वाढत असतानाच मुंबई शहरात मराठी माणसाला न्याय मिळवून देण्याचे काम अनेक संस्था, सहकार क्षेत्राच्या मार्फत करत आहात. येणाऱ्या काळात आपण अगोदरच जे काम केलेय त्यासाठी तुम्ही ठरवाल त्या बॅनरखाली कार्यक्रम घ्यावा. आपण जी क्रांती घडवून आणली आहात ती मुंबईकरांच्या समोर ठेवणे महत्वाचे असून जे २२ स्वयंपुनर्विकासाचे प्रकल्प यशस्वीरित्या पार पडले त्या २२ प्रकल्पाकडे बघून येणाऱ्या काळात हजारो हौसिंग सोसायट्या कर्ज मागण्यासाठी आपल्या दारात उभ्या असतील असा विश्वासही साटम यांनी व्यक्त केला.

तत्पूर्वी आ. दरेकर यांनी म्हटले कि, मुंबईतील सहकार चळवळीला मी ताकद देतोय. मुंबईतील सहकाराला एवढी ताकद देत असेन, मुख्यमंत्री फडणवीस आपल्या पाठीशी ठामपणे उभे राहत असतील तर तुम्हीही एकत्रितपणे नवनिर्वाचित अध्यक्षांना त्यांचे मुंबईचे जे स्वप्न पूर्ण करायचे आहे त्यासाठी हातभार लावावा या भावनेतून ही बैठक बोलावली आहे. आपण अनेक योजना आणतोय. लाडक्या बहिणींना एक लाखाचे बिनव्याजी कर्ज दिले. २५ हजार महिलांना मुंबईत छोट्या छोट्या व्यवसायासाठी बिनव्याजी कर्ज द्यायचे आहे, हे आपले उद्दिष्ट आहे. सुदैवाने राज्याचे सहकार चळवळीचे नेतृत्व करण्याची संधी मला मिळाली. १०६ वर्षाची परंपरा असलेल्या व राष्ट्रपिता महात्मा गांधी यांच्या उपस्थितीत स्थापन झालेल्या महाराष्ट्र राज्य सहकारी संघाचे अध्यक्षपद भूषविण्याची संधी मला मिळाली. मुख्यमंत्री फडणवीस आपल्याला सर्व ताकद देणार आहेत. ग्रामीण भागाची अर्थव्यवस्था सहकारावर अवलंबून आहे. माझे सहकारातील कार्यकर्त्यांना नेहमी सांगणे असते कि, मुंबईची अर्थव्यवस्थाही सहकाराच्या ताब्यात असली पाहिजे. १५ हजार कोटीच्या बँकेचा अध्यक्ष प्रविण दरेकर होऊ शकतो हे केवळ सहकाराच्या ताकदीवर. ही सर्व ताकद एकत्रित करायची असून या ताकदीला दिशा द्यायची असल्याचेही दरेकर म्हणाले.

*आगामी काळात षन्मूखानंदही कमी पडेल*

*एवढ्या सहकारी कार्यकर्त्यांचा मेळावा घेऊ*

मुंबई झपाट्याने बदलते आहे. सहकाराला मुख्यमंत्री फडणवीसांचे संरक्षण आहे. ज्या सहकाराच्या जीवावर राष्ट्रवादी व इतर पक्षाचे नेते मोठे झाले परंतु त्यांचे सहकाराकडे लक्ष्य नाही. मी जेव्हा जेव्हा सांगतो त्यावेळी मुख्यमंत्री फडणवीस आपल्यामागे पहाडासारखे उभे राहतात. त्यांचे स्वप्न मुंबईच्या विकासाचे असेल त्यासाठी तुम्हीही त्याच ताकदीने आपला खारीचा वाटा मुंबईच्या योगदानात दिला पाहिजे. येणाऱ्या काळात षन्मूखानंदही कमी पडेल एवढ्या मोठ्या संख्येने सहकारी कार्यकर्त्याचा मेळावा घेऊ, असा विश्वासही दरेकरांनी उपस्थितांना दिला.