प्रमोद देठे – भाईंदर पश्चिम फाटक रोड परिसराजवळील डॉ. बाबासाहेब आंबेडकर यांच्या पूर्णाकृती पुतळ्याजवळ नियमितपणे कपडे वाळत घालणे, कचरा टाकणे तसेच दुचाकी व चारचाकी वाहने पार्क केल्याच्या प्रकारांमुळे नागरिकांत व खास करून आंबेडकरी जनतेत तीव्र नाराजी व्यक्त होत आहे. या पार्श्वभूमीवर सामाजिक कार्यकर्ते उमेश रमेश शिंदे यांनी संबंधित महापालिका व पोलीस प्रशासनाला लेखी निवेदन देत त्वरित कारवाईची मागणी केली आहे.
शिंदे यांनी दिलेल्या निवेदनात म्हटलं आहे की, “संविधान निर्माता डॉ. बाबासाहेब आंबेडकर यांच्या पुतळ्याजवळ होणाऱ्या अशा कृतींमुळे समाजाचा सन्मान आणि आदर बाधित होत आहे. हा परिसर सामाजिक आणि ऐतिहासिक दृष्ट्या संवेदनशील असून, अशा असभ्य कृतींमुळे पुतळ्याचा सन्मान कमी होत आहे.”
पुतळ्याजवळील परिसरात नियमितपणे स्वच्छता न केल्याने कचऱ्याचे ढीग साचले आहेत. त्यातच काही नागरिकांनी त्या ठिकाणी कपडे वाळत घालणे आणि वाहन पार्किंगचे ठिकाण म्हणून वापर सुरू ठेवला आहे. त्यामुळे परिसराचे सौंदर्य आणि पुतळ्याचा गौरव दोन्ही बाधित होत असल्याचे स्थानिक नागरिकांचे म्हणणे आहे.
या संदर्भात प्रशासनाने पुतळ्याजवळ चेतावणी फलक आणि सिसीटीव्ही कॅमेरे बसवावेत तसेच परिसरात नियमित स्वच्छता आणि देखरेख ठेवावी, अशी मागणी करण्यात आली आहे.
“डॉ. बाबासाहेब आंबेडकर यांचा पुतळा हा समाजाच्या स्वाभिमानाचे प्रतीक आहे. त्याचा अवमान सहन केला जाणार नाही,” असा इशाराही सामाजिक कार्यकर्ते उमेश रमेश शिंदे यांनी प्रशासनाला दिला आहे.