मुंबई | प्रतिनिधी : मुंबईच्या कोस्टल रोडवरील बोगद्यात गुरुवारी सकाळी एका कारला अचानक आग लागल्याने दोन्ही बाजूंनी वाहतूक पूर्णपणे ठप्प झाली. यामुळे बोगद्याच्या दोन्ही टोकांवर वाहनांच्या लांबच लांब रांगा लागल्या आणि प्रवाशांना प्रचंड कोंडीला सामोरे जावे लागले.
ताडदेव परिसरातील कोस्टल रोड बोगद्याच्या दक्षिणेकडील भागात एका कारमध्ये आग लागल्याची माहिती मुंबई वाहतूक पोलिसांनी दिली. आगीच्या धुरामुळे बोगद्याचे वातावरण पूर्णतः ढगाळ झाले. सुरक्षिततेच्या दृष्टिकोनातून दोन्ही दिशांची वाहतूक तात्काळ थांबवण्यात आली.
“वाहतूक तात्पुरती थांबवली आहे” — मुंबई ट्रॅफिक पोलिस
मुंबई ट्रॅफिक पोलिसांनी सोशल मीडियावर अपडेट देत सांगितले की, “ताडदेव कोस्टल रोडवर आग लागल्याने दक्षिण आणि उत्तर दिशेकडील वाहतूक तात्पुरती थांबवण्यात आली आहे. कृपया पर्यायी मार्गाचा वापर करा.”
घटनेची माहिती मिळताच दोन अग्निशमन गाड्या घटनास्थळी दाखल झाल्या. ब्रीच कँडी एक्झिटमधून बोगद्यात प्रवेश करून त्यांनी आग आटोक्यात आणण्यासाठी शर्थीचे प्रयत्न केले. सुदैवाने या घटनेत कोणतीही जीवितहानी झाल्याचे वृत्त नव्हते.
या घटनेचे व्हिडिओ आणि फोटो अनेक प्रवाशांनी ‘X’ ट्विटर वर पोस्ट केले. काही वापरकर्त्यांनी लिहिले की, “बोगद्यात काहीतरी मोठा प्रकार घडलेला दिसतो, रस्ता पूर्णपणे बंद आहे.” तर काहींनी वाहने बोगद्यातून मागे वळताना दाखवणारे व्हिज्युअल्स शेअर केले.
सकाळच्या वेळेत ही घटना घडल्यामुळे मोठ्या प्रमाणात वाहतूक कोंडी झाली. पोलिसांनी वाहतूक जवळच्या पर्यायी मार्गांवर वळवली असली तरी, काही वेळेसाठी संपूर्ण रस्ता ठप्प राहिला आणि वाहनचालकांनी मोठा मनस्ताप सहन केला.
मुंबई पोलिसांनी नागरिकांना शांत राहण्याचे आणि अधिकृत सूचनांचे पालन करण्याचे आवाहन केले असून, कोस्टल रोडवरील वाहतूक पूर्ववत होण्यासाठी प्रशासन युद्धपातळीवर काम करत आहे.