मुंबई – संजय गांधी राष्ट्रीय उद्यानातील पीडित, वंचित आणि शोषित असलेल्या आदिवासी पाड्यातील नागरिकांसोबत भाजपा गटनेते व महाराष्ट्र गृहनिर्माण स्वयं/समूह पुनर्विकास प्राधिकरणाचे अध्यक्ष (कॅबिनेट मंत्री दर्जा) आमदार प्रविण दरेकर यांनी आज भाऊबीजेच्या दिवशी दिवाळी साजरी करत फराळ आणि मुलांना फटाक्यांचे वाटप केले. यावेळी आदिवासी व वनविभागाच्या कर्मचारी महिलांनी आ. दरेकर यांचे भाऊबीजेनिमित्त औक्षण केले.
याप्रसंगी भाजपा जिल्हाध्यक्ष बाळा तावडे, मुंबई भाजपा उपाध्यक्ष प्रकाश दरेकर, महामंत्री बाबा सिंग, निखिल व्यास, युनूस खान, विकी चौगुले, मंडल अध्यक्ष अमित उतेकर, सम्राट कदम, कृष्णकांत दरेकर यांसह मोठ्या संख्येने आदिवासी महिला-पुरुष आणि लहान मुले उपस्थित होती.
आदिवासी पाड्यातील नागरिकांना दिवाळीच्या शुभेच्छा देत दरेकर म्हणाले कि, अनेक राजकीय पक्ष दिवाळीचे फटाके उडवताहेत. कोण काळी दिवाळी साजरी करताहेत तर कोण दीपोत्सव करताहेत. पण भाजपा हा एकमेव पक्ष आहे त्याचे कार्यकर्ते आदिवासी पाड्यांत पीडित, शोषित आणि वंचित समाज आहे त्यांच्यासोबत दिवाळी साजरी करताहेत. खऱ्या अर्थाने अंत्योदयाचा विचार पंडित दीनदयाल यांनी दिला. गरिबांच्या कल्याणासाठी सातत्याने काम करा हा संदेश, विचार पाळण्याचे काम करणारा भाजपा हा पक्ष आहे.
दरेकर पुढे म्हणाले कि, मी आयुष्यात कुठलाच कार्यक्रम काही मिळावे म्हणून करत नाही. गेली १५ वर्ष या १६ आदिवासी पाड्यांवर दिलासा देण्याचे काम करतोय. यंदा माझा वाढदिवसही धाराशिव जिल्ह्यातील वागेगव्हाण या गावी शेतकऱ्यांसमवेत त्यांना फराळ देऊन साजरा केला. या झगमगणाऱ्या मुंबईत मोठी लोकं दिवाळी उत्साहात साजरी करतात. त्यावेळी झोपडपट्टीत, आदिवासी पाड्यातील आदिवासीनीही आनंदाने दिवाळी साजरी करावी, त्यांच्यासोबत आम्हाला येता यावे यासाठी हा कार्यक्रम असल्याचेही दरेकर म्हणाले.
तसेच आदिवासी पाड्यांचे मूलभूत सुविधा, कायद्याच्या चौकटीतील जे प्रश्न आहेत ते २०-२५ वर्ष मला माहित आहेत. तुम्हाला कुठेही बाहेर जाऊ देणार नाही. याच परिसरात तुमचे पुनर्वसन कसे करायचे हे पाहू. खासदार पियुष गोयल केंद्रात मंत्री आहेत. केंद्रातून लागेल ती मदत देणारे गोयल आहेत. राज्यात वनमंत्री गणेश नाईक संवेदनशील आहेत. त्यामुळे तुमच्यावर जोरजबरदस्तीने अन्याय होऊ देणार नाही. जे काही होईल ते तुमच्या सहमतीनेच होईल, असा विश्वासही दरेकर यांनी यावेळी दिला.
आदिवासी पाड्यांतील मुलांनी चांगले शिक्षण घ्यावे
दरेकर म्हणाले कि, तुमच्या आई वडिलांनी जे कष्ट केलेत ते लक्षात ठेवा. चांगले शिक्षण घ्या. सरकारच्या आदिवसीसाठी अनेक योजना आहेत. मुलांना शिक्षणासाठी सुविधा आहेत. आदिवासीच्या मुलांना शिक्षणासाठी लागेल ती मदत करण्यासाठी मी आणि भाजपा तुमच्या सोबत आहोत. या पाड्यातील मुले चांगले शिक्षण घेऊन मोठे अधिकारी झाले पाहिजेत, अशी अपेक्षाही दरेकरांनी व्यक्त केली.
देशाच्या सर्वोच्च पदी आदिवासी महिला
दरेकर म्हणाले कि, आपल्या आदिवासी समाजाच्या भगिनी द्रौपदी मुर्मू देशाच्या राष्ट्रपती आहेत. हा आदिवासी समाजाचा सन्मान आहे. राष्ट्रपती हे सर्वोच्च पद आदिवासी समाजाच्या भगिनीला भूषवताहेत हा आदिवासीचा सन्मान पंतप्रधान नरेंद्र मोदी आणि भाजपाने केलाय. आदिवासी समाजाच्या आयुष्यात खऱ्या अर्थाने प्रगती व्हायची असेल तर तुमचे आशीर्वाद भाजपा, पंतप्रधान नरेंद्र मोदी आणि राज्याचे मुख्यमंत्री देवेंद्र फडणवीस यांच्या पाठीशी राहो, असा आशावादही दरेकरांनी व्यक्त केला.